Бүгүн Хомустаах бөһүөлэгэр модульнай конструкциялаах фельдшерскэй-акушерскай пуун дьиэтэ үлэҕэ киирэр үөрүүлээх түгэнэ буолла. Хомустаах бөһүөлэгэр баччаҕа диэри анаан балыыһа дьиэтэ тутула илигэ, эргэ уопсай олорор дьиэҕэ үлэлээн кэллэ. Онон бөһүөлэккэ саҥа көрдөрөр балыыһа киириитэ олохтоохторго улахан үөрүү.
ФАП дьиэтэ «Биир ньыгыл Арассыыйа» бырагыраамматынан, РФ «Доруобуйа харыстабыла» национальнай бырайыагынан, «Сахауниверсал» ХЭТ ылсыытынан, кылгас болдьоххо тутуллан 70 кв.м. иэннээх аныгылыы, тупсаҕай оҥоһуулаах тутуллан үлэҕэ киирдэ.
Хомустаахха өр кэмҥэ, 20-с сылын эҥкилэ суох фельшеринэн үлэлээн кэлбит саҥа ФАП дьиэ хаһаайката Марианна Дегтярева бу курдук санаатын үллэһиннэ:
– Олохтоохтор өр кэмтэн ыралаабыт ыара санаабыт дьэ туоллан, аныгы ирдэбилгэ толору эппиэттиир сабыс-саҥа балыыһаланныбыт. Манна ыарыһахтары көрөн-истэн, эмтээн-томтоон, прививкалары туруоран, ЭКГ түһэрэн үлэлииргэ бары усулуобуйа тэрилиннэ, онон салалтабытыгар махталбыт улахан.
Салгыы улуустааҕы киин балыыһа кылаабынай бырааһа Анна Петрова маннык эттэ:
– Маннык эбийиэктэр тутуллуулара доруобуйа харыстабылын сайдыытыгар төһүү күүс буолар. Улууспутугар маннык бэһис эбийиэкпитин туттубут. Бастакы эбийиэкпит 2019 сыллаахха тутуллубута, күн бүгүнүгэр диэри чиҥник турар, эбийиэктэр кыһын сылаастар. Бу дьиэни 8 мөлүйүөн суумаҕа тутан таһаардылар. Хааччыстыбата олус үчүгэй. Улуустааҕы кииннэммит балыыһа билигин 47 эбийиэктээх үлэлии олоробут. Национальнай бырайыак 2017 сылтан үлэлиэҕиттэн, онно киирсэн аҕыс балыыһа тутулларыгар үлэлэспиппит. Онтон биэһэ тутулунна.
Сыллата үлэ барар, билигин 18 эбийиэги уочаракка киллэрдибит. Онон салгыы Бээди, Майаҕас, Бэйдиҥэ, Найахы, Тулуна балыыһаларын тутуулара күүтүллэр. Ону таһынан, бэлиэтээн эттэххэ, 2026 сылга Бороҕоҥҥо сылга 300 өлүгү быһаарар күүстээх морг дьиэтэ тутуллуоҕа. 2017 сылтан уопсайа 16 единица тиэхиньикэ саҥардылынна. Онон, улууспутугар доруобуйа харыстабылын эйгэтигэр сайдыы барар. Түгэнинэн туһанан, СӨ Ил Дархана Айсен Николаевка, СӨ доруобуйа харыстабылын миниистирэ Лена Афанасьеваҕа, улууспут дьаһалтатын баһылыгар Алексей Федотовка махталбытын тиэрдэбит.
Мария Аргунова