М.К. Аммосов аатынан ХИФУ иһинэн сүрүннээн устудьуоннар идэ үөрүйэхтэрин ылан салгыы үлэ булуналларыгар ис кыахтарын сайыннарар сыалтан икки сыл анараа өттүгэр саҥа арыллыбыт «Центр оценки и развития компетенций» салаа салайар үлэһиттэрэ Ирина Большедворцкая, Ульяна Эверстова тоҕус устудьуону илдьэ кэлэн улуус салалтатын кытта көрүстүлэр.
Кэпсэтиини улуус дьаһалтатын аппараатын салайааччыта Мария Горохова илээн-саҕалаан ыытта. Улууспут тэрилтэлэрин салайааччылара, бэрэстэбиитэллэрэ бэйэлэрин үлэлиир эйгэлэрин билиһиннэрэн туран, кинилэргэ ханнык идэлээх үлэһит наадатын билиһиннэрдилэр.
Холобур, улуустааҕы ДЬуоКХ инженерэ Анатолий Алексеев 556 үлэһиттээх 45 хочуолунайы оттон олороллорун билиһиннэрэн туран, тэрилтэлэригэр сыбаарсык, электрик, инженер, (IP) програмист идэлээх дьон наадаларын эттэ. Олох баарын тухары наадалаах тэрилтэҕэ, тоҕоостоох идэҕэ үлэлии киирэллэригэр ыҥырда.
Оттон улуустааҕы култуура начаалынньыга Сергей Нафанаилов улууска 35 култуура дьиэтин таһынан 28 бибилэтиэкэ, үс мусуой култуура управлениетын иһинэн үлэлиирин кэпсээтэ. Итиэннэ култуура иһинэн үгүс норуодунай кэлэктиип, түмсүүлэр үлэлииллэрин билиһиннэрдэ. Онон үлэлии кэлбит эдэр киһи бэйэтин сайыннарарыгар усулуобуйа баар диэн эттэ. Бэйэтин төрөөбүт дэриэбинэтинэн холобурдаан, эдэр дьон тыа сиригэр таласпаттарын, дьиҥэр, үлэһит үрдэлин ыларга тыа сириттэн саҕалыыр ордук табыгастааҕын санатта. Бэйэтэ ХИФУ-га устудьуоннар профсоюзтарын бэрэссэдээтэлин солбуйааччытынан үлэлээбит киһи быһыытынан сүбэ-ама биэрдэ.
Көрсүһүү кэнниттэн, устудьуоннар улуус мусуойуттан саҕалаан тэритэлэр үлэлэрин көрө-истэ бардылар.
Сарсын устудьуоннар «Өркөҥҥө» улууспут эдэр исписэлиистэрин, актыбыыстарын кытта көрсүһүөхтэрэ, ол кэпсэтиилэрин түмэн бырайыактарыгар туһаныахтара.
Мария Аргунова