1944 сыл балаҕан ыйын 5 күнүгэр Нарев өрүһү туорааһыҥҥа хорсун быһыыны көрдөрбүт Аҕа дойду Улуу сэриитин кыттыылааҕа, Россия Федерациятын Дьоруойун үрдүк аата өлбүтүн кэннэ 1996 сыл кулун тутар 27 күнүгэр Саха сириттэн бастакынан иҥэриллибит Михаил Стрекаловскай төрөөбүтэ 110 сыла олунньу 4 күнүгэр туолла. Бу бэлиэ даатаны көрсө кини сиэн кыыһа Елена Гоголева эһэтин мэтириэтин быысабайдаан оҥорон Өнөр орто оскуолатыгар бэлэхтээтэ.
Олунньу 3 күнүгэр М.М. Стрекаловскай аатынан Өнөр орто оскуолатыгар Дьоруой кыргыттара Екатерина Михайловна, Любовь Михайловна уонна сиэн кыыһа Елена Иннокентьевна оскуола үөрэнээччилэригэр анал уруоктары ыыттылар. Бэлиэ түгэнинэн 95*70 см кээмэйдээх, арааматынаан 1 м*75 см мэтириэти оскуолаҕа үөрпүүлээх быһыыга-майгыга бэлэхтээтилэр.
Елена Иннокентьевна Гоголева (Стрекаловская) Дьоруой бастакы кэргэниттэн Елена Иннокентьевна Черноградскаяттан бастакы уолун Иннокентий Михайлович иккис оҕото буолар. Елена 1996 с. ЯПУ-1 бүтэрэн төрөөбүт улууһугар алын сүһүөх кылаас учууталынан үлэтин саҕалаабыта. Остуойкаҕа 11 сыл үлэлээн баран дьиэ кэргэнинээн Бороҕоҥҥо кэлэн олохсуйбуттара. Мүрү 2-с нүөмэрдээх орто оскуолатыгар 21 сыл кыралары үөрэппитэ. Үлэлии сылдьан 2009 с. СГПА үөрэнэн бүтэрбитэ.
Кэргэнинээн Валерий Петрович Гоголевтыын үс оҕону төрөтөн, улаатыннаран, билигин сэттэ сиэн эбэтэ, эһэтэ буоланнар күн иллэҥэ суох дьон. Ол эрээри иккиэн уопсастыбаннай үлэттэн туора турбаттар. Елена Иннокентьевна 2017 сылтан «Алаас» түөлбэ салайааччытынан үлэлиир. Быыс буллар эрэ быысабайдыыр, баайар, кылынан дьарыктанар. Кини илиитин сылааһын иҥэринэн кыл сэлээппэлэр, дэйбиирдэр, сапсыыкалар айыллан тахсаллар. Маны тэҥэ лобзигынан араас оһуордары чочуйан таһаарарын сөбүлүүр. Кэргэнинээн дьиэлэрин түннүктэрин, палисаднигы кэрэ көстүүлээх гына оҥорбуттара.
Елена Иннокентьевна эһэтин мэтириэтин Улуу Кыайыы 75 сылын көрсө 2020 сыллаахха бүтэрбитэ. Сайын Өнөр ыһыаҕар туттарар былааннааҕа хамсыгынан кыаллыбатаҕа. Онтон дьэ бу быйыл Дьоруой төрөөбүтэ 110 сылын көрсө үөрэммит Өнөр оскуолатыгар үлэтин бэлэхтээтэ.
Эһэтин мэтириэтин Елена сыл курдук оҥорбут. Барыта 34 араас өҥнөөх сабы туттубут. Киһи сөҕөр үчүгэй үлэтэ буолбут. 32 сыл пед. ыстаастаах учуутал, дьиэ кэргэн тапталлаах ийэтэ, эбэтэ Елена Гоголева айар дьоҕура, талаана сайдан бар дьонун саҥа үлэлэринэн үөрдүө турдаҕа.
Елена Сыроватская, уопсас. кэрэсп.