Бүгүн Уус Алдан улууһун баһылыга Василий Аммосов Лөгөй нэһилиэгин Хомустаах бөһүөлэгин олохтооҕо Геннадий Дягилевка дьиэ туттарыгар 1 236 858 суумалаах сэртипикээти туттарда. Бу – Саха сиригэр «Комплексное развитие сельских территорий» судаарыстыбаннай бырагырааманан түөрт квота көрүллүбүтүттэн бииригэр Геннадий Вениаминович тиксэн үөрүү көтөллөннө.
Оскуолаҕа хачыгаарынан, харабылынан үлэлиир уонна 2018 сылтан бааһынай-фермерскэй хаһаайыстыбаны тэринэн дьарыктанар Геннадий Дягилев 2020 сыллаахха уһаайба атыылаһан 2021 сылтан дьиэтин көҥдөйүн туппут. Оттон быйыл судаарыстыбаттан көмөҕө тиксэн, «дьиэбин салгыы туттар буоллум» диэн үөрүүтэ муҥура суох.
Салгыы кини маннык эттэ:
– Өссө 2018-2019 сыллаахха бу бырагыраамаҕа киирсээри докумуон эккирэтиһэн иһэн тохтоон хаалбытым. Онтон быйыл тохсунньу бүтүүтүн диэки сайабылыанньа биэрбитим. Онтум аҥаардас биһиги улууспутуттан хас да киһи сайабылыанньа биэрбититтэн куонкуруһу ааһан, көмө харчы миэхэ көрүллүбүтүттэн олус үөрдүм. Улууһум баһылыгар Василий Ивановичка, улуус дьаһалтатын дьиэ-уот боппуруоһугар салаатын салайааччыта Марина Черкашинаҕа, улуус баайын-дуолун, сирин-уотун сыһыаннаһыыларын тэрилтэтин салайааччыта Екатерина Алексееваҕа махталым муҥура суох. Бу бырагыраамаҕа кэнники квота олус аҕыйаан, эрэлим кыра этэ. Кинилэр барытын ыйан-кэрдэн, докумуоннарбын сөпкө бэлэмнээн ыытан, маннык көмөнү ылар чиэскэ тигистэҕим.
Санатан эттэххэ, маннык көмөнү быйыл сыл саҥатыгар Суотту нэһилиэгин Хоноҕор бөһүөлэгэр олорор биэс оҕолоох Марфа, Егор Черосовтар дьиэ кэргэн ылбыттара.
Мария Аргунова