Саҥа дьыл уһун өрөбүллэригэр улуус киинин Бороҕону килиэбинэн хааччыйааччылар бары тохсунньу 5 күнүгэр диэри үлэлээбэттэрин биллэрбиттэрэ. Маныаха урбаанньыт Николай Исаков абыраата диэххэ сөп.
Кини Саҥа дьыл эрэ иннинэ Бороҕон илин өттүгэр, улуус балыыһатын таһыгар маҕаһыын арыйан, онно килиэп астаан аҕалан ити түөлбэ олохтоохторо улаханнык үөрбүппүт.
Бу өрөбүллэргэ биллэриллибит сынньалаҥынан сибээстээн Бороҕон маҕаһыыннарыгар килиэп ыйытааччыны элбэҕи көрүстүм, иһиттим. Арҕаа эҥээр сылдьыбыт маҕаһыыннарбар бииригэр да килиэп баарын көрбөтүм. Арай «илин «Сандал» маҕаһыыҥҥа баар үһү» диэн Бороҕон араас муннугуттан массыыналар субуллаллар.
Мин эмиэ дьиэбэр баран иһэн ол маҕаһыыҥҥа таарыйдым. Ити киэһэ 17 чаас ааһыыта этэ. Бастакы кэлии бүппүт. Иккис партия килиэп сотору кэлиэ диэн буолла. Инньэ гынан күүтэммин, сотору аҕаллылар. Хантан кэлэрин туоһуласпыппар: «Курбуһахтан аҕаллылар», – диэн хардардылар.
Урбаанньыт Николай Исаков ыраах Курбуһахха бэкээринэ үлэлэтэрин истэбин. Онон онтон, 80 км сиртэн күҥҥэ иккитэ килиэп аҕалан, бүгүн, сарсын Бороҕону килиэбинэн аһатар урбаанньыт Николай Исаковка махтал буоллун.
Афанасий Сектяев