Сэтинньи 23 күнүгэр өрөспүүбүлүкэтээҕи медиа кииҥҥэ суруналыыс Сергей Москвитин суруйбут «Я в тылу не останусь» диэн анал байыаннай дьайыыга хорсуннук охтубут Василий Данилов туһунан кинигэтин билиһиннэрии буолбута.
Кинигэ ааптар киирии тылын кэнниттэн Василий Данилов нуучча эбэтин туһунан кэпсээнтэн саҕаланар. Ийэтинэн эбэтэ Нина Хрисанфова Великолукскай уобаластан төрүттээҕэ. Эдэркээн нуучча кыыһа Нам Хамаҕаттатын уолугар Егор Кудриҥҥа кэргэн тахсан, 4 кыыс, 2 уол оҕоломмута. Вася Данилов кыратыгар нуучча эбэтигэр сайылыыра. Нуучча эбэтиттэн күн курдук сырдык баттаҕа, сэбэрэтэ бэриллибит.
Вася ийэлээх аҕата Лидия Егоровна, Василий Агитович Даниловтар тапталынан холбоспуттара, Дмитрий, Марина кэннилэриттэн Васялара 1989 сыл олунньу 19 күнүгэр төрөөбүтэ.
Вася оҕо сааһын, оскуолатааҕы кэмин кинигэ ааптара ахтыылартан түмэн киһини тардар гына суруйбут. Вася кыра эрдэҕиттэн эппиэтинэстээҕэ, мөлтөххө, кыаммакка ураты истиҥ сыһыаннааҕа көстөр. Мүрү 1гы нүөмэрдээх орто оскуолатыгар 8-11 кылаастарга кылааһын салайааччыта Ксения Румянцева ахтарынан, Вася аҕыйах оҕолоох нуучча кылааһыгар үөрэммит. Үрдүкү кылааска идэни талыыга анал тиэһи толоруу түмүгүнэн, Васяҕа бастакы миэстэҕэ байыаннай дьыала, иккискэ электро-радиотехник идэлэрэ тахсаллар эбит.
Кинигэҕэ Василий Нарыйалыын тапталлара сырдык хартыына курдук арыллар, чахчы да эрэллээх саха эр киһитэ буолара үгүс киэргэтиитэ суох дьиҥ баарынан сырдатыллар.
Василий Данилов сулууспатын туһунан кэргэнэ Нарыйа, биир идэлээхтэрэ Константин Долгов, Павел Шатскай, Владислав Костаровскай, о.д.а. сэрии суоһар алдьархайын этинэн-хаанынан билбит дьон хайдах баарынан кэпсээбиттэрин оннооҕор хараххар оҥорон көрөр ыарахан. Василий Данилов сулууспатын кэмигэр араас мүччүргэннээх түгэҥҥэ уолуйан хаалбакка, сөптөөх быһаарыныыны ылынан, үгүс киһини өлөр өлүүттэн быыһаабыта. Кыргыһыы хонуутугар бүтэһигин Мэҥэ-Хаҥалас уола Николай Семенов атаҕар бааһырбытыгар бастакы көмөнү оҥорон баран, кинини эвакопууҥҥа аҕалан туттарбыта. «Кэккэлэһэ улуустарбыт, хайаан да ыалдьыттаһыахпыт», — диэн арахсаллар. Ол кэннэ 4 эрэ чаас буолаат, Василий Данилов сырдык тыына быстар. Ити хара дьайдаах күн 2022 сыл сэтинньи 4 күнүгэр түбэспитэ. Гвардия ст. сержана Василий Данилов баара суоҕа 33 сааһыгар сүрэҕэ тэппэт буолбута.
Геройдар өлбөттөр. Өлбөттөр дьон өйдүүрүн, ахтарын, киэн туттарын тухары. Сүүрбүт-көппүт тапталлаах Бороҕонугар кини пааматынньыга, Ленин аатынан уулуссаҕа билборд, үөрэммит оскуолатыгар сүүнэ мэтириэтэ Василий Данилов хорсун быһыытын кэпсииллэр. Аны күн курдук сырдык киһи туһунан үгүс хаартыскалардаах кинигэ өйдөбүл бэлиэтэ буолан үйэлэргэ хаалыаҕа.
Елена Сыроватская, уопсас. кэрэсп