Өнөргө сэтинньи 17 күнүгэр өрөспүүбүлүкэбитигэр Үлэ, Уус Алдан улууһугар Инфраструктураны сайыннарыы сылларын чэрчитинэн аккомпаниатор, СӨ култууратын туйгуна Василий Федоров көҕүлээһининэн «Иитиллибит алааһым» диэн төрөөбүт дойду туһунан байаанынан ырыа күөн-күрэһэ тэриллэн намыын матыыптарга уйдаран, тыыннаах дорҕоон доҕуһуолланан бэртээхэй дьоро киэһэ буолан ааста.
Куонкурус патриоттуу тыыннаах (дойду туһунан) уонна көҥүл тиэмэҕэ диэн араарыллан ыытылынна, барыта 10 киһи кытынна. Тэрээһини Өнөр нэһилиэгин дьаһалтата, Өнөрдөөҕү «Тускул» СК тэрийэн ыыттылар. Үөрүүлээх аһыллыыны 2017 сыллаахха Гран-при аатын ылбыт Мария Лукачевская «Иитиллибит алааһым» диэн ырыатынан киэргэттэ.
Дьүүллүүр сүбэҕэ “Олоҥхо дьиэтэ” этнокультурнай киин уус-уран салайааччыта, СӨ култууратын туйгуна Елизавета Данилова, улуус, өрөспүүбүлүкэ ырыа күрэхтэрин кыайыылааҕа Өнөрдөөҕү «Тускул» СК дириэктэрэ, СӨ култууратын туйгуна Ион Лукачевскай, улуустааҕы «Тойон Мүрү», СӨ ырыа айааччыларын, баянистарын Сойуустарын чилиэнэ, СӨ култууратын туйгуна Станислав Луковцев үлэлээтилэр.
Куонкурус түмүгүнэн кыайыылаахтары наҕараадалааһын буолла. Ырыаһыттарга Танда баяниһа Владислав Кривошапкин, Мүрүттэн Василий Петухов, Өнөртөн Василий Федоров, Курбуһахтан Николай Бурнашев байаанынан доҕуһуоллаатылар.
Гран-при хаһаайынынан Тандаттан “Дьиэрэй” ансаамбыл солиһа Семен Поисеев буолла. Бирииһи Дария, Михаил Лукачевскайдар ааттарынан оҕолоро – ырыа куттаах Лукачевскайдар туруордулар. Бастакы ист. лауреат – Николай Бурнашев (Курбуһах). Бирииһи мелодист Николай Лыткин оҕолоро, сиэннэрэ, иккис ист. лауреат бирииһин Владимир Егоровка (Мүрү) Михаил Федоров оҕолоро, үһүс ист. лауреат Василий Петуховка (Мүрү) Өнөр нэһилиэгин олохтоох дьаһалтата туруордулар.
Бастакы ист. дипломант Долгууна Кардашевскаяҕа (Өнөр) бирииһин “Мүрү–Эһэлээх” түмсүү, иккис ист. дипломант Александр Лукачевскай (Өнөр) ИП Мари я Ушницкая, үһүс ист. дипломант Николай Лыткиҥҥа (Өнөр) бирииһин сыана бэтэрээнэ Николай Лукачевскай анаатылар.
«Иэйиилээх ырыа» анал аат Герасим Софроновка (Танда) бирииһин сыана бэтэрээнэ Нина Лукачевская, «Чуор куолас» анал аат Елизавета Черкашина (Мындааба) бирииһин Өнөрдөөҕү «Тускул» СК туруорда. «Ымыылаах ырыаһыт» анал ааты ылбыт Николай Бурнашевка (Курбуһах) бирииһин 1986 сыллааҕы выпускниктар, «Дойду туһунан бастыҥ ырыа» анал аат Семен Поисеевка (Танда) бирииһин сыана бэтэрээннэрэ Любовь, Петр Максимовтар дьиэ кэргэттэрэ бэлэхтээтилэр. «Көрөөччү биһирэбилэ» анал ааты Долгууна Кардашевскаяҕа (Өнөр) бирииһи Өнөрдөөҕү «Тускул” СК , “Бастыҥ доҕуһуол » анал ааты Василий Петуховка (Мүрү) бирииһи СӨ култууратын туйгуна, Өнөрдөөҕү «Тускул» СК аккомпаниатора Василий Федоров, «Кэскиллээх ырыаһыт» анал ааты Мичил Егоровка (Танда) бирииһи СӨ култууратын туйгуна, Өнөрдөөҕү «Тускул » СК дириэктэрэ Ион Лукачевскай туруордулар.
Спонсордаабыт дьоммутугар махтал суругу кулууп кэлэктиибэ туттарда. Бары даҕаны баян тыаһыгар доҕуһуолламмыт ырыаны дуоһуйа истэн, сынньанан тарҕастыбыт.
Варвара Парникова – Үүйэ, уопсас. кэрэсп.