Өнөр нэһилиэгэр олунньу 5 күнүгэр сахалартан бастакы Арассыыйа Дьоруойа Михаил Стрекаловскай төрөөбүтэ 111 сылынан «Дьоруой сулуһа үйэлэргэ тыыннаах» диэн дьоруойга аналлаах араас тэрээһиннэр, ону тэҥэ оскуолаҕа аһаҕас уруоктар , нэһилиэк олохтоохторугар викторина ыытылыннылар.
Сүрүн тэрээһин «Тускул» сынньалаҥ киинигэр «Дьоруой бойобуой суолунан айан» диэн ааттанан бэрт интэриэһинэйдик буолан ааста. Маны М.М. Стрекаловскай аатынан Өнөр орто оскуолатын кэлэктиибэ, олохтоох музей эбии үөрэхтээһинин педагога Снежана Лукачевская уонна кулууп кэлэктиибэ тэрийэн ыыттылар. Тэрээһин «Өйдөбүнньүк уоту» уматыыттан саҕаланна. Миитиҥҥэ нэһилиэк баһылыга Николай Лукачевскай буойун Михаил Стрекаловскай олоҕун туһунан кылгастык ахтан аһарда.
Салгыы «Тускул» сынньалаҥ киинигэр дьоруой төрөөбүт дойдутуттан Эһэлээхтэн маршрутнай хаамыынан күрэхтэһии буолла. Сыала-соруга – эдэр көлүөнэни дойдуга бэриниилээх буолууга иитии-үөрэтии, араас көлүөнэлэр икки ардыларыгар алтыһыыны олохтооһун. Манна биэстии киһилээх хамаанданан кыттыыны ылыллар. Бастаан М.М. Стрекаловскай олоҕор сыһыаннаах ыйытыыларга хоруйдаатылар. Ити кэнниттэн маршрутунан айан саҕаланна.
Бастакы тохтобул – «Суотту». Манна саллаат мөһөөччүгүн хомуйдулар. Салгыы «Дьокуускай куорат» тохтобулга саллаат таҥаһын таҥныы буолла. «Чита» тохтобулга дартс оонньууга күрэхтэстилэр. «Москва» тохтобулга ахсаан суоттаан өйдөрүн сыстылар. Салгыы кыргыһыы хонуутугар айаннаан Курскай Тоҕойго тиийэн, сэрии тиэмэтигэр ребус таайдылар. «Минскэйгэ» корнхол оонньоотулар. Бойобуой суолун тиһэх тохтобулугар Польшаҕа дьоруой мэтээллэрин, уордьаннарын таайдылар.
Дьоруой дойдутугар төннөн кэлэн, кадровай булчутунан сылдьыбыта. Онно сыһыаннаах күрэс: туомтуу быа баайыыта, мээчигинэн сыал быраҕыыта, муоска көлөөскөнү быраҕыы буолла. Бэрт сэргэх күрэхтэһии түмүгүнэн дьүүллүүр сүбэ быһаарыытынан үһүс миэстэ «Эһэлээх», иккис миэстэ «Победа» хамаандалар буоллулар. Оттон кыайыылааҕынан «Дьоруой» хамаанда буолан үөрдүлэр-көттүлэр. Ону тэҥэ биирдиилээн оонньооччуларга анал ааттары олохтоотулар. «Саамай элбэх ыйытыыга хоруйдаабыт» аатынан Дамир Яценко, «Саамай көхтөөхтүк кыттыбыт» – Радомир Лыткин, «Өркөн өй» – ытык киһибит Николай Лукачевскай, «Саамай сымса кыттааччы» – Аэлита Ушницкая, «Кыраҕы харах» – Эльвира Федорова, «Снайпер. Бастыҥ быраҕааччы» – Олимпий Бочкарев, «Тулуурдаах быраҕааччы» – Мария Лукачевская уонна «Дарст кыайыылааҕа» аатынан Петя Ушницкай, бөрүөнэн, чэрэниилэнэн суруйууга «Саамай кыраһыабай буочар» аатынан Анатолий Черноградскай бэлиэтэннилэр.
Ити курдук бу тэрээһинтэн оскуола үөрэнээччилэрэ история чахчыларын билэн сэргэхсийэн тарҕастылар.
Варвара Парникова – Үүйэ, уопсас. кэрэсп.