Бүгүн Суотту нэһилиэгэр Хоноҕор бөһүөлэгэр олорор түөрт оҕолоох Егор уонна Марфа Черосовтар дьиэ кэргэннэригэр Саҥа дьылы көрсө улахан үөрүүлээх күн үүннэ. Кинилэр дьиэ тутталларыгар судаарыстыба өйөбүлүнэн туһанар кыахтаннылар.
Ол курдук СӨ Ил Дарханын судаарыстыбаннай бырагырааманы олоххо киллэрэр соруктаах «Комплексное развитие сельских территорий в 2020-2025 годы» ыйааҕа 2019 сыллаахха тахсыаҕыттан бу бырагырааманан улууспутугар дьиэ тутталларыгар, атыылаһалларыгар үгүс ыал үбүнэн өйөбүлү ылбыта.
Быйыл маннык субсидия сэртипикээтин үс ыал ылан, квота бүппүтүн да иһин, улуус дьаһалтатын баһылыга Василий Аммосов туруорсан өссө биир ыалга өйөбүл көрүллэрин ситистэ. Онон бүгүн Черосовтар дьиэ кэргэн аҕаларыгар үс мөлүйүөн кэриҥэ суумалаах сэртипикээти Василий Иванович уонна улуус дьаһалтатын дьиэ-уот боппуруоһугар салаатын салайааччыта Марина Черкашина, кылаабынай исписэлиис Аксинья Бурнашева туттардылар.
Ыал аҕата Егор Иванович өр сылтан ымыы оҥостубут баҕа санаалара туолар буолбутуттан долгуйан туран маннык эттэ:
– Биһиги дьиэ кэргэн бу бырагыраамаҕа 2019 сылтан уочаракка турбуппут. Бэйэм оҕо тэрилтэтигэр харабылынан үлэлиибин, кэргэним оҕолорун көрөн олорор. Икки кыыс, икки уол оҕолоохпут. Улахаттарбыт оскуолаҕа 3-с, 2-с кылааска үөрэнэллэр, икки кырабыт оҕо саадыгар сылдьаллар. Кырабыт үс саастаах. Дьоммут дьиэлэригэр олоробут. Ийэ хапытаалын, үһүс оҕоҕо бэриллэр судаарыстыбаннай көмөнү туһанан 108 кв.м. иэннээх дьиэ көҥдөйүн туттубуппут.
Билигин дьэ бу сэртипикээтинэн туһанан дьиэбитин салгыы ситэрэн, өссө толору хааччыллыытын киллэрэн, олбуордаан аны күһүн бэйэбит бас билэр дьиэлэнэн-уоттанан олорор буолуохпут диэн үөрүүбүт муҥура суох.
Кэргэним, оҕолорум сырдык, сылаас дьиэҕэ киирэн төһө эрэ үөрэллэр. Бу эдэр, элбэх оҕолоох ыалга наһаа улахан көмө. Василий Ивановичка уонна Аксинья Ильиничнаҕа, Марина Михайловнаҕа наһаа ис сүрэхтэн кыһаллан, сүүрэн-көтөн биһиги ыалга маннык көмөнү ситиспиттэригэр хайдах да махтаныахпын булбаппын, олоҕум тухары махтаныаҕым.
Мария Аргунова