Дүпсүннээҕи «Кэскил» детсад үрдүк категориялаах иитээччитэ РФ үөрэҕириитин бочуоттаах үлэһитэ Любовь Прибылых ыҥырыытынан биир дойдулаахпыт, улуу тренер, гроссмейстер Петр Ушницкай ыалдьыттаата.
Оҕолор убаастыыр биир дойдулаахпытын, аатырбыт тренери, дуобаты олоҕун аргыһа оҥостубут Петр Ушницкайы үөрэ-көтө көрүстүлэр. Бастаан утаа уруккуттан билэр киһилэринии истиҥник сэһэргэстилэр, ыйытыыларыгар хоруйдаатылар. Сорохтор киниттэн бэйэтиттэн эмиэ ыйыталаһар дьон буолан соһуттулар. Онтон дьэ гроссмейстер оҕолор хайдах оонньуулларын билсэ маастар-кылааһы саҕалаата уонна 5-6 саастаах кырачааннар сатаан дуобаттыыллар эбит диэн үөрдэ.
Петр Петрович олус табыгастаахтык, кырачааннарга сөп түбэһэрдии быһааран үөрэтэн дьиҥнээх педагог буоларын көрдөрдө. Сандал Кудрин, Тамира Игнатьева олус тапсан, өйдөһөн гроссмейстеры кытта оонньоотулар. Бу икки оҕону ордук сатыылларын бэлиэтии көрөн хайҕаата, кинилэри кытта хаартыскаҕа түстэ.
Улуу дуобатчыт, биир дойдулаахпыт Петр Ушницкай дойдутун Дүпсүн сирин кэлэр кэскиллэригэр – «Кэскил» оҕо саадын иитиллээччилэригэр бу өйү сайыннарар оонньууну көрдөрөн билиһиннэрбитигэр, маастар-кылаас ыыппытыгар истиҥ махталбытын тиэрдэбит, киниэхэ үлэтигэр үрдүк ситиһиилэри, чэгиэн доруобуйаны баҕарабыт.
Александра Молокотина, Дүпсүннээҕи «Кэскил» детсад сэбиэдиссэйэ