Оҕо сайыҥҥы сынньалаҥар Дүпсүн орто оскуолатын иһинэн космонавтика уонна авиация музейа төрүттэммитэ 50 сылыгар анаан икки сезон устата бөһүөлэктэн чугас кэрэ айылҕалаах Дабаадымаҕа лааҕыр үлэлээтэ.
От ыйын 10 күнүгэр куораттан кэлэн мөлтөхтүк истэр инбэлииттэр ортолоругар дуобакка Арассыыйа гроссмейстердара Дүпсүнтэн төрүттээх Петр Ушницкай уонна кини үөрэнээччитэ, Ньурба ыччата Александр Ефимов лааҕыр оҕолоругар маастар-кылаас ыыттылар, сеанс биэрдилэр. Тириэньэр Петр Ушницкай биирдии, иккилии хаамыылаах сорудахтары толортордо. Таба суоттаабыт, актыыбынайдык кыттыбыт Айсен Леонтьев (Дүпсүн о.о., 6 кыл.), Айсен Иванов (Мүрү 1 нүөмэрдээх о.о., 7 кыл.), Аман Пестряков (Мындааба о.о., 7 кыл.), Күннэй Копырина (Дүпсүн о.о., 8 кыл.) гроссмейстер Петр Ушницкайтан кинигэ бэлэх туттулар.
Гроссмейстердары ыҥыран ыалдьыттаппыт лааҕыр начаалынньыга Ольга Протопопова:
– «Кустук» лааҕырбыт техническэй хайысхалаах. «ТехноЛето. Полет» хайысханан үлэлиир лааҕыр 2-с сезонугар улуус 9 оскуолатыттан 25 оҕо сырытта. «Өркөн» оҕону эбии үөрэхтээһин киинин педагога Иван Иванов оҕолору дьарыктаата. Киниэхэ педагог-психолог Маргарита Алексеева күүс-көмө буолла. Маны тэҥэ оҕо сынньалаҥын тэрийиигэ, аһатыыга, көрүүгэ-истиигэ асчыттар Аксинья Дмитриева, Марфа Сивцева, мед. үлэһит Раиса Сивцева кыһамньылаахтык үлэлээтилэр.
«Кустук» лааҕыр 1990 сыл от ыйын 11 күнүгэр аһыллыбыта. Лааҕыры туппут, салайсыбыт киһинэн оскуолаҕа учууталлыы, дириэктэрдии сылдьыбыт Гаврил Сивцев буолар. Бүгүн лааҕырбыт 34-с сылын бэлиэтиибит. Ону тэҥэ 2-с сезон сабыллыыта оҕолорго умнуллубат күнү бэлэхтиэ диэн эрэнэбит.
Елена Сыроватская, уопсас. кэрэсп.