Хас биирдии күҥҥүн эн кэскилиҥ, күҥҥэ көрдөрбүт көмүһүҥ – тапталлаах оҕоҥ туһугар олороҕун, кини чөл туруктаах, кыахтаах-уохтаах, ситиһиилээх буоларыгар бары санааҕын түмэҕин, кыаххын уураҕын. Онуоха быйыл Сахабыт сиригэр Оҕо саас сыла биллэриллибитэ бу үтүө баҕа санааларбыт сайдалларыгар, олоххо киирэллэригэр биир эмиэ сүҥкэн көмө. Оттон Россияҕа Дьиэ кэргэн сыла саҕаламмыта барыта биир сомоҕо күүс буолан, оҕо туһугар анаммыт үлэ-хамнас ситиһиилээх, таһаарыылаах буоларыгар сирдиир.
В.В. Алексеев аатынан Мүрүтээҕи уолаттар гимназияларын 11 “б” кылааһын үөрэнээччитэ Дуолан Гаврильев 2023 сыл түмүгүнэн “Мүрү нэһилиэгин бастыҥ үөрэнээччитэ” үрдүк ааты сүктэ. Дуолан гимназияҕа бэһис кылаастан туйгуннук үөрэнэр, математикаҕа күүстээх, дьоҕурдаах уол техническэй хайысхаҕа сыстан, инники идэтин аныгы технологиялары сайыннарыыга көрөр.
“Маннык анал ааты ылбытым олус үөрүүлээх. Үйэ ирдэбилинэн аныгы технологиялары олус интэриэһиргиибин. Бу хайысханан араас тэрээһиннэргэ, куонкурустарга конференцияларга кытта сатыыбын. Биллэн туран, саамай сөбүлүүр предметим информатика. Онон инники олохпун IT-технология диэки салайыахпын, аныахпын баҕарабын. Хобби быһыытынан программирование араас көрүҥнэринэн дьарыктанабын, олус сөбүлүүбүн. Түмүкпэр республикабытыгар Оҕо саас сыла саҕаламмытынан эҕэрдэлиибин. Тус бэйэҕитигэр, үлэҕитигэр, үөрэххитигэр ситиһиини баҕарабын! ” – диэн Дуолан бэйэтин туһунан билиһиннэрдэ уонна баҕа санаатын тиэртэ.
Дьоҕурдаах, талааннаах уол гимназия, улуус тэрээһиннэригэр актыыбынайдык кыттар. Сыл ахсын информатика, обществознание, математика олимпиадаларыгар кыттан кыайыылааҕынан тахсар. Араатардар республикатааҕы “ЯРА” куонкурустарыгар бастыҥынан ааттаммыта. Аҥардас ааспыт 2023 сылга Саха сирин бастакы президенин Михаил Николаев оскуолаларын ситимин информатикаҕа олимпиадатын кыайыылааҕа, улуустааҕы «IT-хакатон” күрэхтэһиитигэр “Бастыҥ менеджер” анал аат хаһаайына, гимназия “Добун – 2023” анал аатын лауреата, “право” предмеккэ бүтүн Россиятааҕы оскуола оҕолорун олимпиадатын (ВОШ) республикатааҕы этабын кыайыылааҕа уонна информатикаҕа араас таһымнаах олимпиадалар кыттыылааҕа. Дуолан бу ситиһиитэ кини инники олоҕор саҥа саҕахтары арыйдын, баҕа санаата томтойо туоллун!
Ольга Шепелева