«Мүрү боотурдара» успуорт төрүт көрүҥнэригэр уолаттар күрэхтэһиилэрэ түмүктэннэ. Быйылгы күрэхтэһиигэ 6 уол күүстэрин холоннулар. Хас көрүҥ түмүгүнэн үс бастакы миэстэҕэ тахсыбыттар туоһу суруктары, харчынан сертификаттары тутан истилэр.
Илин кэлин түсүһүүлээх, хатыһыылаах күрэхтэһии түмүгүнэн Владимир Мигалкин (Мүрү 2 нүөмэрдээх орто оскуолата), Айаал Гуляев (УҺун Күөл орто оскуолата) 21-дии очколаах тэҥнэһэн баран, хаачыстыбанан Айаал Гуляев II миэстэҕэ таҕыста, Владимир Мигалкин III миэстэни ылла. Мүрү 1 нүөмэрдээх орто оскуолатыттан Долун Жирков 19 очкону сурунан, кыайыылаах үрдүк аатын сүктэ, 15 тыһ. солк. суумаҕа сертификаты тутта. Оттон II, III миэстэҕэ тахсыбыттар туһааннааҕынан 10 уонна 5 тыһ. солк. суумалаах сертификаттарынан бэлиэтэннилэр.
УҺун Күөл оскуолатыттан Богдан Дугунов бары көрүҥҥэ биир тэҥник кыттан анал ааты ылла. Кыттааччылар Марсен Лыткин (Уһун Күөл орто оскуолата, IV миэстэ), Богдан Дугунов (V миэстэ), Дьулусхан Сивцев (Мүрү 2 нүөмэрдээх орто оскуолата, VI миэстэ) добун суруктары туттулар.
Боотурдар, тэрийээччилэр, оскуолалар учууталлара «Мүрү боотурдара» күрэхтэһииттэн өрө көтөҕүллэн тарҕастылар. Күрэхтэһиини ыытыыга Мүрү нэһилиэгин урбаанньыттара, выпускниктар уонна оскуолаҕа үлэлии сылдьыбыт: «Дисплей» ХЭТ генеральнай дириэктэрэ Олег Соловьев, «СӨ ДьУоКХ» ГУП Уус Алданнааҕы филиалын салайааччыта Евгений Цой, урбаанньыттар Семен Бурнашев, Гаврил Шелковников, Мария Андросова, Сардаана Портнягина, Дамирбек Эркинов, Надежда Бережнева, Клара Бурнашева, Василий Андросов спонсордаан күүстээх өйөбүлү оҥордулар.
Бу оонньууну 2017 сыллаахха оскуола дириэктэрэ Семён Бурнашев көҕүлээн саҕалаабыта. Оҕо тэрилтэтин үлэтин тэрийээччи Дария Петухова күрэхтэһии түһүмэхтэрин толкуйдаан, спонсордары булан тэрийсибитэ. Ол кэмтэн ыла бу күрэхтэһии сыл аайы ыытыллара үгэскэ кубулуйда. Икки сыл хамсыгынан тохтуу сылдьыбыта.
Елена Сыроватская, уопсас. кэрэсп.