Сааһыран истэх аайы эдэр сааспытыгар биир интэриэстээхтик, эрбии тииһинии хатыһан, илин-кэлин түсүһэн, бииргэ сайдан, ситэн-хотон тахсыбыт дьүөгэ кыргыттарбын күндүтүк саныырым, өрүү көрсөн, ахтыһа кэпсэтиэхпин баҕарарым күүһүрэн иһэргэ дылы. Ол иһин пионерия күнүгэр өрүү көрсө сатыыбыт, сорохторбут бу орто дойдуга суохтар.
Биһиги көлүөнэ уратыбыт диэн, уоттаах сэриини кыайбыт дьон оҕолоро буолабыт, кинилэр өйдөрүнэн-санааларынан иитиллибиппит. Ол иһин эрэллээх доҕор буоларга, ыарахантан толлубат дьулуурдаах, дойдуга туһалаах киһи буоларга туохтан да баҕаран туран дьулуһарбыт. Ол – биһиги көлүөнэ туохха да бэриллибэт баайбыт.
Итинник иитиллэн эдэркээн комсомол кыргыттары оройуон орто уонна аҕыс кылаастаах оскуолаларыгар пионербаһаатай оҥортообуттара. 1970 сыллаахха Зинаида Дмитриевна тэрийиитинэн «Искра» старшай баһаатайдар этэрээттэрэ тэриллибитэ. Комсомол райкомун дьаһалынан пионерскай дружиналар баһаатайдарга оройуоҥҥа пионерскай үлэни илиибитигэр ылан көхтөөхтүк, ситиһиилээхтик, тэрээһиннээхтик үлэлээбиппит. Билигин санаатахха, олус да үчүгэй кэмнэр ааспыттар эбит. Билигин оскуоланы бүтэрбит оҕолор кылаастарын туһунан кинигэ таһаараллар. Онно саамай күндүтүк саныыллара пионер буола сылдьыбыттарын ахталлара эбит, көрсүһүүгэ бары пилотка уонна пионерскай кыһыл хаалтыстаах буолаллара киһини үөрдэр.
Биһиги Саха сиригэр пионерскай тэрилтэ 100 сыллаах үбүлүөйүн «Искра» этэрээтин баһаатайдара, Дьокуускайга олорооччулар балай да тэрээһиннээхтик атааран эрэбит. Ыам ыйын 18 күнүгэр Ил Түмэн дьиэтин таһыгар дьоһуннук туттан олорор саха норуотун тумус туттар киһитэ Василий Васильевич Никифоров – Күлүмнүүр пааматынньыгар төрөөбүт күнүнэн сибээстээн Дьокуускай куорат общественноһын, Ил Түмэн, правительство тэрээһинигэр кыттан сибэкки ууруутугар кытынныбыт. Онтон депутаппыт Ил Түмэн Государственнай мунньаҕын бэрэссэдээтэлин бастакы солбуйааччы, саха норуотун чулуу киһитэ, киэн туттуута Александр Николаевич Жирков ыҥырыытынан, кини кабинетыгар приемҥа сырыттыбыт. Ханна да буолларбыт, өрүү стройдаан девиз, рапорт этэн, анал пионерскай ырыабытын ыллаан көрсүһүүбүтүн саҕалаатыбыт уонна бэтэрээн баһаатайдар Уус Алданнааҕы ассоциацияларын аатыттан бочуоттаах пионерга киллэрэн кыһыл хаалтыс баайдыбыт.
Александр Николаевич бэйэтин эҕэрдэтин пионерскай олоҕуттан саҕалаан, активист пионер буолан «Орленок» лааҕырга сынньаммытын, пионербаһаатайыгар Светлана Дмитриевна Солдатоваҕа махтанарын эттэ. Пионерскай тэрилтэ оҕолору түмэрин, үөрэххэ, үлэҕэ көҕүлүүрүн, онно дружина баһаатайа улахан оруоллааҕын ыйан туран, бары кэлбит 10 ветеран баһаатайга махтал суруктары туттарда, сибэкки бэлэхтээтэ.
Ол кэннэ итии үүттээх хойуу чэйи иһэ-иһэ ирэ-хоро кэпсэттибит. Хас биирдии баһаатай пионерскай үлэтин, кэлин туох үлэһит буолбуттарын кэпсээтилэр. «Искра» этэрээт салайааччыта З.Д. Винокурова таһаарбыт кинигэтин Александр Николаевичка бэлэхтээтэ, Л.Н. Васильева, З.М. Егорова, З.К. Желобцова, Н.Н. Белолюбская, И.С. Новгородова, М.С. Охлопкова, Е.И. Ильина, М.Н. Ноговицына, А.С. Крылова, А.П. Бурнашева ахтыыларын сэргээн иһиттибит. Кыыһар кыһыл хаалтыстаах пионердар этэрээттэрэ, дружиналара араас тэрээһиннэрэ: сбордар, костердар, тимуровскай көмөлөр, следопыттар үлэлэрэ, интернациональнай доҕордоһуу кулууптара, десаннар, кэтэхтэн айаннар, олорор сиринэн үлэлэр, уо.д.а. үлэ формалара оччотооҕу көлүөнэ ыччаты иитиигэ сүҥкэн оруолу ылбыттара ахтылынна.
«Балары иилээн-саҕалаан ыытааччы, оҕолуу ыраас дууһалаах, өрүүтүн сырдык санаалаах, хаһан баҕарар көмөҕө кэлэр эрэллээх доҕор, кытыастар сүрэхтээх пионер баһаатайдар буолаҕыт, Ийэ дойдуга бэриниилээх буолууну иитиигэ улахан кылааккытын киллэрсибиккит, кэлин да араас салаа үлэлэргэ ол пионерскай эрчимҥитин ыһыктыбакка үлэлээбиккитин астына бэлиэтиибин, олоххутугар куруутун билинии, убаастабыл эрэ эҥэрдэстин», – диэн алгыс тылынан истиҥ-иһирэх көрсүһүүнү Александр Жирков түмүктээтэ.
Биһиги, баһаатайдар эдэрбитигэр түһэн, тутум үрдээн, астынан, дуоһуйан убаастабыллаах Александр Николаевичка махтанан, үлэтигэр ситиһиини, доруобуйаны баҕаран туран, саҕалаабыт үлэтэ сатанан, ситэн силигилээтин, толкуйдаабыта туолан истин диэн баҕа санаабыт бастыҥын аныыбыт. Урааҥхайдыы уруй буоллун, сахалыы айхал буоллун!
«Искра» этэрээт аатыттан Анна БУРНАШЕВА, Дүпсүн орто оскуолатын В.Д. Лонгинов аатынан сэттэ төгүл уҥа флангаҕа турар пионерскай дружина баһаатайа