Дьокуускай куорат киинигэр турар «Арчы дьиэтигэр» кулун тутар 11 күнүгэр Уус Алдан улууһун Мүрү 2-с №-дээх орто оскуолатын 8 “а” кылааһын үөрэнээччитэ Сабина Павлова «Кэрэни кэрэхсээ» диэн бастакы тус быыстапкатын үөрүүлээх арыллыыта буолан ааста.
Сабина доруобуйатыгар хааччахтаах оҕолорго туһуламмыт дистанционнай эбии үөрэхтээһин тэрилтэтигэр «Саҥа технологиялар институттарыгар» иккис сылын «Волшебная вата» кууруска үөрэммит ситиһиитин дьон-сэргэ дьүүлүгэр быыстапка оҥорон таһаарда.
Баата эйгэтин умсулҕаныгар Сабинаны эрэ буолбакка кини дьиэ кэргэнин бүтүннүү учуутатала Василена Валериевна сирдиир. Баататтан араас оҥоһуктары, оонньурдары, хартыыналары оҥорор, кырааскалыыр, араас конкурстарга ситиһиилээхтик кыттарын таһынан баататын тематынан НПК-ҕа кыттан эмиэ үрдүк көрдөрүүлээх.
Сабина доруобуйатынан хааччахтаах, ол да буоллар олоххо тардыһыыта, дьулуура, тулуура, чугас дьонун өйөбүлэ, хас биирдии күнүттэн астыныыта бу үтүө күн барыта көһүннэ. Баатаны таһынан пластилинныырын, оҕуруонан араас киэргэллэри оҥорорун сүрдээҕин астынар. Уруучуканы, ободогу, духи хаатын коллекциялыыр.
Быыстапка арыллыытыгар Сабинаны эҕэрдэлии Мүрү 2-с №-дээх орто оскуолатын директора С.Е. Фомин, кылаас салайааччыта Т.В. Бурнашева, уруһуй учуутала Н.П. Стручкова уонна бииргэ үөрэнэр оҕолорун аатыттан Олимпия Алексеева ырыа кэһиилээх, Уус Алдан үөрэҕин салалтатын, СППСиМ аатыттан анаан-минээн кэлэн эҕэрдэлээтилэр. Маны сэргэ талааннаах кыысчааҥҥа үөрэнэр института, «Арчы дьиэтэ», Экология министерствота, «Харысхал» благотворительнай фонда, «Азбука» канцтовар маҕаһыына, «Үргэл» арт-галерея бэйэлэрин махтал уонна эҕэрдэ суруктарын кытта өйдөбүнньүк бэлэхтэрин туттардылар. Дьокуускай куорат историятын музея Сабина оҥоһуктарын бэс ыйыгар оҕо көмүскэлин күнүгэр бэйэтин түмэлигэр быыстапкаҕа ыҥырар туоһу суругун биэрдэ.
Сабина алыптаах үлэлэрэ кулун тутар 11-18 күннэригэр диэри «Арчы дьиэтигэр» көрөөччүлэри үөрдүөҕэ.
Киһи орто дойдуга олороору, туох эрэ кэрэни саҕаары кэлэр. Ол да иһин буолуо Сабина талаана, тулуура, мындыра бу быыстапкаҕа көһүннэҕэ. Бу күн кини олоҕор биир умнуллубат түгэн буолан, баҕа санаата туолла диэн эрэллээхпит.
Василена Шарина, учуутала, Дьокуускай куорат