С. Васильев-Борогонскай аатынан кииннэммит библиотекаҕа коллекционер оҕолор быыстапкаларыгар сырыттыбыт. Бу куонкуруһу оҕо улуустааҕы библиотеката уонна коллекционердар “Умсулҕан” түмсүүлэрэ тэрийбиттэр.
Араас нэһилиэктэртэн 21 кыттааччы кэлбит, онон араас эгэлгэ коллекциялары көрдүбүт. Сыырдаахтан сылдьар Виолетта Бурцева 5 сааһыттан тыһыынчаттан тахса «киндер» оонньууру муспут. Саамай урукку 1990-с сыллардааҕы бастакы «киндер» оонньуурдара бегемотиктартан саҕалаан бааллар. Барытын тус-туспа тиэмэлээн уура сылдьар эбит.
Айтал Готовцев сыл ахсын элбэх быыстапкаҕа кыттар эбит. Кини сэттэ сааһыттан Рубик кубиктарын араастарын мунньан саҕалаабыт. Манна төгүрүк, үс муннуктаах, эҥин араас головоломкалар бааллар. Өссө Рубик кубигын туһунан дакылаат суруйан, Москваҕа научнай-практическай конференцияҕа кыттан 3-с миэстэ буолбут. Айтал коллекциятын үөрэххэ туһалыыр эбит диир. Улууска, өрөспүүбүлүкэҕэ спидкубинг күрэхтэһиилэригэр ситиһиилээхтик кыттар уол кубигын биир мүнүүтэ сэттэ сөкүүндэнэн хомуйан көрдөрдө.
Сааскылаана уонна Алгыстаана Гоголевалар 271 араас уруучуканы мунньан кэлбиттэр. Наташа уонна Саина Стручковалар олус элбэх значок мунньубуттар. Саамай кыра кыттааччы Айыллаана Лыткина 5 саастаах. Кини коллекцията эмиэ «киндер» оонньуурдар, 100-тэн тахса оонньууру муспут.
Быыстапканы “Умсулҕан” коллекционердар түмсүүлэрин чилиэннэрэ дьүүллээтилэр. Бастакы миэстэҕэ Айтал Готовцев таҕыста. Иккис миэстэни элбэх тимир, кумааҕы харчыны мунньубут Эрсан Колесов буолла. Маны таһынан коллекционердар кыттыбыт оҕолорго анал бириистэри туттардылар.
Бүгүҥҥү быыстапка эһиилги “Умсулҕан” коллекционердар түмсүүлэрин 30 сылыгар бэлэмнэнии курдук буолла. «Эһиил үбүлүөйдээх сылга улахан быыстапка буолуо, онно бары коллекцияҕытын өссө кэҥэтэн кэлэргитигэр баҕарабын», – диэн коллекционердар түмсүүлэрин чилиэнэ Вера Портнягина эттэ.
Василиса Васильева. “Өркөн” оҕону эбии үөрэхтээһин киинин пресс-киинэ