Бу орто туруу-бараан дойдуга ыал буолан олоруу, оҕо-уруу төрөтөн удьуору тэнитии үрдүк дьол, олоххо ситиһии буолар. Ол аата олох олоруу дьоло дьиэ кэргэҥҥэ биһиктэнэр анала түстэнэр.
Быйыл дойду үрдүнэн Дьиэ кэргэн сыла биллэриллибитэ мээнэҕэ буолбатах. Дьиэ кэргэн уопсастыба биир тутаах кэрчигэ, элбэх оҕону иитии, үөрэттэрии, атахтарыгар туруоран уопсастыбаҕа туһалаах дьон буолалларын ситиһии ийэ, аҕа сырата, кыһамньыта.
Курбуһах нэһилиэгин ытык ыала Клара Никитична, Коммунар Андреевич Аммосовтар биир сүбэнэн уһуннук олорбут эрэ буолбатахтар, кинилэр 90 саастарын ааспыт уһун үйэлээхтэр. Дьоһун ыал сүрэхтэрин холбообуттара быйыл 64-с сыла буолла. Ол аата ыал буолан уһуннук олоруу кэрчиктэрин кыһыл көмүс, бриллиант сыбаайба диэни аастылар.
Аммосовтар алта оҕону төрөтөн, олоххо суолларын булларан, оҕолор билигин бары үтүө үлэһит дьон аатын ыланнар айа-тута сылдьаллар. Кырдьаҕастар бэйэлэрэ сопхуос күүрээннээх үлэтин туругурдуспут дьон. Клара Никитична холкуос, сопхуос ыанньыксыта этэ. Оттон Коммунар Андреевич тырахтарыыс, тутааччы быһыытынан биллэр. Кураан дьылларга кыһын Кэбээйиттэн тыраахтарынан от таһыытыгар сылдьыбыта. Оччо ыраах айаҥҥа, улахан сорудахха, биллэн турар, бастыҥ, эрэллээх эрэ тырахтарыыстар бараллара.
Клара Никитичнаны, Коммунар Андреевиһы оҕолорун таһынан, аны 9 сиэн, 3 хос сиэн ааттаталлар. Онон кэскиллэрэ кэҥээн иһэр.
Күндү дьоммут маннык иллээх олоххут 65 сыл бииргэ олорбут Тимир сыбаайбаҕытынан түстэннин, үйэ мөҥүөнүгэр үктэнэр үөрүүлэниҥ.
Афанасий Сектяев