Саха сирин үтүөлээх учуутала,ССРС географическай уопсастыбатын дьиҥнээх чилиэнэ, кыраайы үөрэтээччи Георгий Васильевич Данилов аатынан ааҕыылар улууспутугар ыытыллар буолбуттара хас да сыл буолла. Г.В. Данилов 30-с сыллартан саҕалаан Нам, Төҥүлү, улууспут Орто Эбэ, Мүрү, Найахы оскуолаларыгар биология уонна география предметтэрин учууталынан бэрт таһаарыылаахтык үлэлээбитэ. Кини сайыҥҥы лааҕырдары, оскуола түмэллэрин тэрийбит үтүөлээх. Ону таһынан биллэр кыраайы үөрэтээччи буолар.
Олунньу 15-17 күннэригэр Мүрү 1-гы № дээх орто оскуолатыгар биология учуутала Ульяна Румянцева көҕүлээһининэн Даниловскай ааҕыылар буоллулар. Быйылгы 7-с ааҕыылар кэтэхтэн ыытыллан, өрөспүүбүлүкэ 19 улууһуттан 235 оҕо кытынна. Ыытыллыбыт научнай-практическай кэмпириэнсийэни ХИФУ, Тыа хаһаайыстыбатын научнай-чинчийэр института, «Юные якутяне» өрөспүүбүлүкэтээҕи ресурснай киин, Мүрүтээҕи юннатскай станция, улуус үөрэҕин управлениета уонна Мүрү 1-гы №-дээх орто оскуолата холбоон ыыттылар.
Оҕолор үлэлэрин ХИФУ преподавателлэрин, институт учуонайдарын тэҥэ эбии улууспут киин балыыһатын үлэһиттэрэ, улуус госинспектордара, профессиональнай фотографтар, техник-программистар кичэйэн көрдүлэр. Бастыҥ үлэлээх 16 оҕо Г.В. Данилов кыргыттарыттан МэҥэХаҥалас улууһун медицинскэй сулууспатын бэтэрээнэ Раиса Никонороваттан, Уус Алдан улууһун бочуоттаах олохтооҕо, РСФСР үөрэҕириитин туйгуна Альбина Говороваттан, СӨ үөрэҕириитин бочуоттаах бэтэрээнэ Саргылана Сыроватскаяттан, тыа хаһаайыстыбатын наукалаларын кандидата, тыа хаһаайыстыбатын чинчийэр институт бэтэрээнэ Анна Емельяноваттан, СӨ адвокаттарын коллегиятын чилиэнэ Галина Даниловаттан бочуотунай грамоталары уонна бириистэри тутуохтара.
Секцияларынан араардахха: “Экологическай наукалар” секцияҕа Юлиана Никитина (7 кылаас, Кэбээйи улууһа, Батамай оскуолата), Долун Жирков (11 кылаас, Уус Алдан, Мүрү 1№ ОО); “Кыраайы үөрэтээччилэр” секцияҕа Карина Апросимова (7 кылаас, Уус Майа улууһа, Күпсүр оскуолата), Арина Старостина (11 кылаас, Абый улууһа, Муҥурдаах оскуолата); “Төрөөбүт кыраайбыт араас көрүҥэ” секцияҕа Амелия Захарова (7 кылаас, Мэҥэ Хаҥалас, Тиэлиги оскуолата), Анджелина-Айыына Нафанаилова (8 кылаас, Уус Алдан, Лөгөйдөөҕү интернат-лицей); медицинскэй наукалар секцияларыгар Дайаана Румянцева (7 кылаас, Уус Алдан, Мүрү 1№ ОО), Анастасия Власьева (11 кылаас, Уус Алдан, Мүрү 1№ оскуолата); Тыа хаһаайыстыбатын наукаларын секциятыгар Вася Богданов (6 кылаас, Таатта улууһа, Таатта лицейэ), Татьяна Кобякова (10 кылаас, Кэбээйи улууһа, Кэбээйи оскуолата); «Отходы (бөх) и доходы» секцияҕа Никита Охлопков (6 кылаас, Ньурба улууһа, Марха оскуолата), Владианна Дьяконова (9 кылаас, Кэбээйи улууһа, Лүксүгүн оскуолата); видеороликтар куонкурустарыгар Айсен Будищев (5 кылаас, Сунтаар улууһа, Сунтаар лицейэ), Николай Оллонов (8 кылаас, УусАлдан, Мүрү 1 № ОО); «Айылҕаны харыстааҥ» хаартысканан куонкуруска Сааскылаана Сокольникова (3 кылаас, Чурапчы улууһа, Чурапчы 1№ оскуолата), Анастасия Тектясова (11 кылаас, Уус Алдан, Чэриктэй оскуолата) бастыҥынан ааттаннылар.
Кэмпириэнсийэ кыттыылаахтара Г.В. Данилов кыргыттарыгар, ыыппыт тэрийээччилэргэ махтаннылар уонна маннык тэрээһиннэр оҕо сайдыытыгар туһалааҕын бэлиэтээтилэр.
Мария Аммосова, уопсас. кэрэсп.