Саха Өрөспүүбүлүкэтин айылҕа харыстабылын, үөрэҕириитин туйгуна, норуот маастара, СӨ гиревой спордун маастара, “Үнүгэс” экологическай лааҕыр салайааччыта, “Туйма” экопаарка төрүттээччитэ, энтузиаст-чинчийээччи, учуутал, алгысчыт, олоҥхоһут Данил Максимов төрөөбүтэ 65 сылыгар “Айбытым-туппутум, алгыстаах тылларым ананар эһиэхэ – бар дьоммор!” диэн бэйэтэ этэн, сурукка тиһэн хаалларбыт тылынан айымньылаах үлэтин быыстапката Суотту нэһилиэгин «Доҕордоһуу» түмэлин экспозиционнай саалатыгар дьон көрүүтүгэр турда.
Быыстапка арыллыытыгар биир дойдулаахтара, аймахтара, бииргэ төрөөбүттэрэ, нэһилиэк дьоно, оскуола үөрэнээччилэрэ, бииргэ үлэлээбит кэллиэгэлэрэ кыттыыны ыллылар. Дьон-сэргэ биһириир үлэлэрдээх биир дойдулаахпыт айар үлэтин үүнэр көлүөнэ ыччакка билиһиннэрии, кини туһунан үтүө өйдөбүл хааларыгар олук ууруллан тэрээһин сүрүн сыалын ситтэ. Быыстапка кэлэр сыл олунньу ортотугар диэри үгүс көрөөччүнү угуйа туруоҕа.
Киһи аҕыс кырыылаах буолуохтаах,
Кылыстыы кылбаҥныы оонньуохтаах!
Арылыйар кустук дьэрэкээнин ылыахтаах,
Үйэлэри үрдүнэн хардыылаан иһиэхтээх!
Киһи өҥнөөх буолуохтаах! – диэн биир дойдулаахпыт поэт Сергей Васильев–Борогонскай суруйан хаалларбыт хоһоонун кынаттаах тыллара Данил Максимов–Айҕыл айан-тутан, үлэлээн ааспыт олоҕор, үлэтигэр-хамнаһыгар сыһыаннаах курдук.
Данил Даниловичпыт, кырдьык да, ханна да кыттыстар талаана, айар дьоҕура, дьону түмэр күүһэ, үйэлээҕи төрүттээбитэ кэнчээри ыччакка холобурга сылдьар, өлбөт өрөгөйдөөх. Быыстапканы Данил Данилович тапталлаах кыыһа Екатерина Даниловна Максимова кэпсээтэ.
“Доҕордоһуу” түмэлин быыстапкалыыр саалатыгар кини айан-тутан хаалларбыт, дэгиттэр уус толкуйунан оҥоһуллубут үлэлэрин, араас хайысхалаах үлэтин быыстапкатын кэлбит дьон олус сэҥээрэн, сонурҕаан көрдүлэр. Оскуола актовай саалатыгар олус истиҥ долгутуулаах ахтыы киэһэтэ буолла. Кэлбит дьон мааны остуол тула сылаас чэй иһэн уруккуну-хойуккуну ахтыһан, санааларын сайа этэн тарҕастылар. «Доҕордоһуу” история-архитектура түмэлин, Суоттутааҕы «Мичээр» сынньалаҥ киинин уонна кини үлэлээбит. айбыт-туппут Суотту орто оскуолатын кэлэктииптэрэ бу айымньылаах, сырдык суоллаах Данил Данилович үлэтин дьон-сэргэ дьүүлүгэр таһааран ахтыы киэһэтин тэрийэн ыытан, кини аатын-суолун, олоҕун-дьаһаҕын, айар үлэтин үйэтитиигэ биир дьоһун хардыыны оҥордулар.
Айаал Аргунов, «Доҕордоһуу» түмэл методиһа