С.С. Васильев–Борогонскай аатынан киин библиотека ааҕар саалатыгар өрөспүүбүлүкэтээҕи «Чолбон» сурунаал ыытар «Өркөн улахан өй оонньуута» күрэһин биһиги улууспутугар ыытта.
Оонньууну «Чолбон» сурунаал бас эрэдээктэрэ Гаврил Андросов уонна сурунаал эрэдээктэрин солбуйааччы, биир дойдулаахпыт Данил Макеев ыыттылар. Күрэх кыттааччыларын улуустааҕы култуура управлениетын салайааччыта Сергей Нафанаилов эҕэрдэлээтэ.
Күрэскэ барыта алта ыал кытынна. Ыйытыылар сүрүннээн саха литературатын төрүттээччилэрин, норуодунай суруйааччылар үлэлэригэр, айымньыларыгар олоҕуран оҥоһуллубуттар, тиэс ньыматынан суругунан хоруйдаатылар.
Биэс түһүмэхтээх күрэскэ 33 ыйытыыттан 30-гар таба хоруйдаан, 1-кы миэстэни Колодезниковтар дьиэ кэргэн (II Лөгөй нэһилиэгэ) ылан өрөспүүбүлүкэтээҕи түһүмэххэ кыттарга туоһу суругу туттулар. 2-с миэстэ Матвеевтар (Лөгөй нэһ.), 3-с миэстэ Крыловтар (Мүрү нэһ.), 4-с миэстэ Винокуровтар (Мүрү нэһ.), Турантаев-Бысыиннар (Тиит Арыы нэһ.) үллэһиннилэр, 5-с миэстэ Васильевтар (Мүрү нэһ.) дьиэ кэргэн ылары ситистилэр.