Түүлээх оскуолатын уолаттара волейбол улуустааҕы күрэхтэһиитигэр кыттан 13 хамаандаттан чөмпүйүөн үрдүк аатын ылары ситистилэр (тренер В.В. Бочкарев, физкультура учуутала М.П. Степанов). Күрэхтэһии сэтинньи 13, 14 күннэригэр Мындаабаҕа ыытыллыбыта, турнирга иккис миэстэни бэйдиҥэлэр, үсүһү сыырдаахтар ылбыттара.
Бу – өр сылларга ситиһиллибэтэх үөрүү: 21 сыл буолан баран Түүлээх үөрэнээччилэригэр чөмпүйүөннэр күөрэйэн, саҥа ааттар ааттаммыттара тренер Владимир Бочкарев сыралаах үлэтин түмүгэ буолар.
Күрэхтэһии түмүгүнэн Степа Кузьмиҥҥа «Бастыҥ оонньооччу», Платон Неустроевка «Бастыҥ кимээччи» анал ааттар туттарылыннылар. Хамаанда састаабыгар Степа Кузьмин, Ариан Бережнев, Платон Неустроев, Эрэл Бочкарев, Айтал Захаров, Ньургун, Эрчим, Артем Винокуровтар кыайыыны турууластылар.
Быйыл саҥа анал таҥас кэтэн, чахчы да миэстэлэһэргэ оҥостон, кыайыыга эрэллээхтик сананан кытыннылар. Дьарык да күүстээх, күннэтэ эбиллиигэ сыраластылар.
Кыайыыны аҕалсыбыт, көмөлөспүт, оонньуур формаларыгар спонсордаабыт дьоммутугар: Ил Түмэн депутатыгар Геннадий Васильевка, биир дойдулаахтарбытыгар Иннокентий Бочкарёвка, Юрий Афанасьевка, Семен Ивановка, Семен Петуховка, Петр Неустроевка, Степан Жирковка, Түүлээх бэтэрээн волейболистарыгар, эскиһин уруһуйдаабыт Июлия Охлопковаҕа, саҥа форманы бэлэх ууммут төрөппүттэргэ барҕа махтал тылларын тиэрдэбит. Оҕолорбутугар өссө да ситиһиилэри, мээччиккит үөһэ кыырайа көттүн!
Агафья Афанасьева, Түүлээх орто оскуолатын учуутала