Быйылгы үөрэх дьылыттан аанын тэлэччи аспыт үс этээстээх аныгылыы тутуулаах, бары ирдэбилгэ эппиэттиир үөрэтэр кабинеттардаах Мүрү 2-с нүөмэрдээх орто оскуолатыгар саҥа үөрэх дьылыгар 565 үөрэнээччи билии, сайдыы суолун арыйыахтара.
Саҥа оскуола бастакы хараҥаччыларынан буолбут 65 кырачаан үс кылааһынан учууталлар Алена Лонгинова, Марианна Колодезникова, Анна Бурнашева үөрэтиилэринэн-такайыыларынан үөрэх-билии баай байҕалын сомсуохтара.
Үөрүүлээх күн оскуола үөрэнээччилэрин, учууталларын, төрөппүттэрин СӨ Бырабыыталыстыбатын бэрэссэдээтэлин солбуйааччы Сергей Местников, улуус баһылыгын дуоһунаһыгар кандидаттар Алексей Федотов, Василий Аммосов бастакы кылаас оҕолоругар кинигэ бэлэхтээх, бастыҥ спортсмен оҕолорго харчынан бириэмийэлээх эҕэрдэ тылларын анаатылар. Учуутал уонна Настаабынньык сылынан оскуола бэтэрээн учууталларыгар Анна Готовцеваҕа, Евдокия Ивановаҕа, Надежда Харитоноваҕа, о.д.а. сибэкки дьөрбөтө туттарылынна.
Бастакы чуораан алыптаах тыаһынан, оскуоланы бутэрээччилэр имигэс үҥкүүлэринэн доҕуһуоллатан үөрэх, үлэ, успуорт үрдүк чыпчаалларын арыйыы саҥа саҕахтара арылыннылар.
Светлана Сивцева