Бороҕоҥҥо бүгүн биир эмиэ бэлиэ күн буолла. Лонгинов аатынан уулусса 29/1 нүөмэригэр “Хаарбах дьиэттэн көһөрүү” федеральнай бырагырааманан тутутллубут дьиэҕэ 48 ыал саҥа кыбартыыраларын күлүүһүн туттулар.
Бу дьиэни “СПМ-Альянс” тэрилтэ тутта. Тутууну салайбыт прораб Никон Васильев кэпсээбитинэн, дьиэ билиҥҥи ирдэбил бары пууннарын тутуһан оҥоһуллубут. Кыбартыыралар балконнара сабыылаахтар, сорохтор киэнэ өссө лоджиялаахтар эбит. Сайыҥҥы кэмҥэ уу сылытар тэрил эмиэ туруоруллубут. Ону тэҥэ хас биирдии кыбартыыраҕа электроплита бэлэм турар. Дьиэҕэ дьон олорор иэнэ 2,278 кв.м.
Үөрүүлээх тэрээһиҥҥэ Уус Алдан улууһун баһылыга Василий Аммосов, Мүрү нэһилиэгин баһылыга Прокопий Румянцев, улуустааҕы бэтэрээннэр Сэбиэттэрин бэрэссэдээтэлэ Олег Федоров кыттыыны ыланнар олохтоохторго истиҥ баҕа санааларын, эҕэрдэлэрин тиэртилэр. Ити кэнниттэн Василий Иванович уонна Прокопий Федотович саҥа дьиэҕэ киирээччилэргэ саҥа кыбартыыраларын күлүүһүн үөрүү-көтүү, уруй-айхал ортотугар туттардылар.
Улуус үрдүнэн бу бырагыраамаҕа Мүрү нэһилиэгин таһынан Дүпсүн, Лөгөй уонна II Лөгөй нэһилиэктэрэ кытта сылдьалларын эттилэр. Онон быйыл өссө алта дьиэ үлэҕэ киириэҕэ. Бырагыраама 2030 сылга диэри үлэлииринэн улууспут нэһилиэктэригэр сыл аайы кэриэтэ саҥа таас, толору хааччыллыылаах дьиэлэр дьэндэһиэхтэрэ.
Афанасий Сектяев