Курбуһах нэһилиэгэ уһун үйэлээхтэр олорор түөлбэлэринэн эрэ биллэр буолбатах. Манна 50 сыл уонна онтон уһуннук сүрэхтэрин сүбэтинэн бииргэ олорор ыал эмиэ элбэх.
Ол курдук Ирина, Василий Курилкиннар, Елизавета, Рудольф Веревкиннар, Татьяна, Иван Пестряковтар, Варвара, Владимир Стручковтар, Анна, Иван Ермолаевтар үйэ аҥаара бииргэ олорон кэллилэр. Онтон Клара, Коммунар Аммосовтар 64, Розалия, Василий Дегтяревтар 60 сыл ыал буолан олороллор. Кинилэр бары элбэх оҕолоохтор, сиэннэрэ, хос сиэннэрэ удьуордарын тэнитэллэр. Манна биири эбэн этиэхэ сөп, Клара Никитична, Коммунар Андреевич 90 саастарын туолбут уһун үйэлээх ытык кырдьаҕастар.
Дегтяревтар
Аммосовтар
Бу орто туруу-бараан дойдуга ыал буолан олоруу, оҕо-уруу төрөтөн удуьуору тэнитии үрдүк дьол, олоххо ситиһии буолар. Быйыл дойду үрдүнэн Дьиэ кэргэн сыла биллэриллибитэ мээнэҕэ буолбатах. Дьиэ кэргэн уопсастыба биир тутаах кэрчигэ, элбэх оҕону иитии, үөрэттэрии, атахтарыгар туруоран уопсастыбаҕа туһалаах дьон буолалларын ситиһии ийэ, аҕа сырата, кыһамньыта.
Күндү дьоммутугар кытаанах доруобуйаны, эйэлээх халлааны, нус-хас олоҕу баҕарабыт!
Афанасий Сектяев