Бэрт Уһугар ыһыах Николай Протопопов 70 сааһыгар уонна «Дьүкээбил» ансаамбыл тэриллибитэ 40 сылыгар ананна

Бэрт Ууһун нэһилиэгэр саха дьоно сайыҥҥы биир бастыҥ бырааһынньыкпыт үрүҥ тунах, үүт сөлөгөй ыһыах күнэ бэрт сэргэхтик ааста. Ыһыахпыт быйыл СӨ култууратын туйгуна, Бэрт Ууһун нэһилиэгин бочуоттаах олохтооҕо, учууталлар Учууталлара Николай Протопопов үбүлүөйдээх 70 сааһыгар, «Дьүкээбил» оҕо ырыа-үҥкүү образцовай ансаамбыла тэриллибитэ 40 сылыгар ананна.

Ыһыах сиэригэр-туомугар Курбуһах нэһилиэгин бочуоттаах олохтооҕо Павел Окоемов кэлэн алгыс тылынан амалыйда, «Кустук» лааҕыр оҕолоро, нэһилиэк үҥкүүһүт далбар хотуттарын «Дойдууна» үҥкүү бөлөҕө үҥкүүлээтилэр, ыһыах ытык дуоҕатын баһылык Илья Ильиҥҥэ нэһилиэкпит биир бастыҥ сылгыһыта Дмитрий Окоемов туттарда, эҕэрдэ тылын этэн туран алгысчыт чороонноох кымыһы туттаран алгыстаах кымыс үрдүн охтоттордо. Кымыс иһиитэ, оһуохай буолла.

Нэһилиэкпит баһылыга Илья Ильин Николай, Октябрина Протопоповтарга уонна Анна Винокуроваҕа, Анна Бурнашеваҕа, Иван Ивановка, Нюргуяна Бурцеваҕа «Бэрт Ууһун нэһилиэгин социальнай-экэнэмиичэскэй сайдыытыгар кылаатын иһин» бэлиэлэри, Афанасий Олесовка, Дмитрий Петровка «Бэрт Ууһун нэһилиэгэр тимиринэн уһаныы дьыалытыгар кылаатын иһин» бэлиэлэри, Николай Протопоповка, Анна Винокуроваҕа Уус Алдан улууһун баһылыгын бочуотунай грамоталарын, ону таһынан Россияҕа Дьиэ кэргэн сылынан уонна бииргэ олорбуттара 60 сылынан Аграфена уонна Константин Слепцовтарга, Россияҕа Дьиэ кэргэн уонна бииргэ олорбуттара 45 сылынан, «Дьүкээбил» ансаамбыл 40 сылынан Николай уонна Октябрина Протопоповтарга, «Дьүкээбил» ансаамбыл 40 сылынан Анна Винокуроваҕа бэйэтин эҕэрдэ суруктарын туттарда.

Бу күн Николай Протопоповка элбэх эҕэрдэ этилиннэ. Ол курдук Сыырдаах оскуолатын коллективын аатыттан директор Иван Портнягин, Сыырдаах оскуолатыгар директорынан үлэлээбит Илья Черноградскай, төһө да доруобуйатынан хааччахтаах буоллар, сыал -сорук оҥостон бэлэмнэнэн кэлэн эмиэ бэйэтин эҕэрдэтин тиэртэ, ыллаан да соһутта, Сэбиэскэй Армия кэккэтигэр 1973-75 сс. бииргэ сулууспалаабыт доҕотторо: Суоттуттан Алексей Охлопков, Тумултан Петр Черкашин, Чурапчы Чакырыттан Иван Тарасов, Петр Флегонтов, Николай Осипов кэлэн тыл эттилэр, бэлэх-туһах туттардылар. Уолаттар бу курдук 50 сыл устата сибээстэрин быспакка, куруук билсэ сылдьаллара хайҕаллаах.

Ыһыах кэнсиэригэр «Дьүкээбил» ансаамбылга Николай Николаевичка, Анна Николаевнаҕа дьарыктаммыт оҕолор кэлэн ыллаан-туойан, үҥкүүлээн киэргэттилэр, биир дойдулаахтарыгар ырыа-үҥкүү кэрэ иэйиитин бэлэхтээтилэр.
Ол курдук кэнсиэргэ А.Н. Винокурова салайааччылаах «Оһуор утум» үҥкүү коллектива, бальнай үҥкүү республикатааҕы, норуоттар икки ардыларынааҕы конкурстарын хас да төгүллээх кыайыылаахтара Оксана Протопопова, Михаил Борисов, кэрэ куоластаах Алита Мигалкина, ыһыахха «Дьүкээбиллэри» түмүүгэ кыһаллан үлэлэспит Галина Матвеева, хатыламмат куоластаах Андрей Васильев, Лаврентий Тарскай кыттыыны ыллылар, ырыаһыттар Ирина Неустроева, Мария Винокурова, Олимпиада Колесова, Анна Неустроева бэйэлэрин айбыт ырыаларын ыллаан үөртүлэр.

Кэнсиэр кэннэ түһүлгэҕэ аһылык кэмигэр олохтоох дьаһалта эмис байтаһын биэ этинэн, быырпаҕынан күндүлээтэ. Онтон салгыы араас куонкурустар, спортивнай күрэхтэһиилэр ыытылыннылар. Кыайыылаахтар нэһилиэкпит Герой Ийэлэрин оҕолоро, сиэннэрэ олохтообут бириистэрин тутан үөрүүлэрэ үрдээтэ, онтон да атын сыаналаах бириис арааһа олохтонно.

Ыһыах күнүскү тэрээһинин урбаанньыт Р.Н. Бурцев «Бааттаах түгэн» сүүйүүлээх оонньуута түмүктээтэ. Улахан бириистэри: Сыырдаахтан Розалия Пегова (тиҥэһэ), Бүлүү Илбэҥэтиттэн Винна Алексеева (убаһа), Сыырдаахтан Александр Шепелев (убаһа) ылан үөрүү-көтүү үктэллэннилэр.

Киэһээ А.П. Иванов аатынан норуот айымньытын киинигэр саха государственнай «Туймаада» вокальнай ансаамбылын кэнсиэрэ сэргэхситтэ. Ол кэнниттэн Эрхаан Слепцов диджейдээх Үрүҥ түүн уоттаах-күөстээх үҥкүү-битии тэрилиннэ.

Анна Неустроева