Икки таптаһар сүрэх ыал буолан, дьиэ-уот тэринэн, оҕо-уруу тэнитэн этэҥҥэ олороллоро туохтааҕар да күндү уонна дьол. Дьол уйатын тэринэн ньир-бааччы олорор түөрт оҕо иһирэх ийэтэ Алена, амарах аҕата Виталий Саввиннар Чэриктэй нэһилиэгин элбэх оҕолоох дьоһун-мааны ыала.
Саввиннар тапталларын чопчута түөрт оҕолоро: улаханнара Артур Арктикатааҕы государственнай агротехнологическай университет (АГАТУ) I кууруһун устудьуона, «Сандал» ансаамбыл үҥкүүһүтэ, улахан кыыс Настя Чэриктэй орто оскуолатын 11 кылааһын үөрэнээччитэ, кыра кыыс Ангела 5 кылааска үөрэнэр уонна мурун бүөтэ кыра уоллара Арсен «Эрэлчээнэ» оҕо саадын иитиллээччитэ.
Чэриктэй мааны кыыһа Алена Алексеевна, Тиит Арыы эрчимнээх ыччата Виталий Петрович учуутал үрдүк аатын сүгэннэр Чэриктэй орто оскуолатыгар биология, химия уонна физкультура учууталларынан үлэлээбиттэрэ 15 сыл буолла. Саввиннар спорду сэҥээрэр, көҕүлүүр чөл туруктаах ыал. Спорт араас көрүҥнэригэр көхтөөхтүк кытталлар. Алена саха төрүт үгэһин тэнитэн хабылык, хаамыска остуол оонньуутунан дьарыктанар. Буулдьалаах саанан ытыыга үөрэхтээһин эйгэтин спартакиадатыгар үгүс бириистээх миэстэҕэ тиксэр кыраҕы харахтаах ытааччы. Кыргыттарын кытта волейболлуулларын сөбүлүүллэр. Аҕалара теннис, дуобат, саахымат, хайыһар спорт көрүҥнэринэн дьарыктанар. Оттон улахан уол – футболист.
Дьиэ кэргэн нэһилиэккэ буолар тэрээһиннэргэ өрүү актыыбынайдык кытталлар. Алена Алексеевна салайар дьоҕурдаах, ылыннарыылаах тыллаах түөлбэ салайааччыта. “Ай-тыас” хомус ансаабылын кыттыылааҕа буолан республикатааҕы, норуоттар икки ардыларынааҕы куонкурустарга кыайыылаах үрдүк аатын ситиспиттэрэ. Икки ытарҕа кыргыттарынаан ырыа алыптаах эйгэтигэр умсан, ыллаан эйээрэр кэрэ куолар. Маны сэргэ тарбаҕар талааннаах, мындыр толкуйдаах хаһаайка оҕолорун кытта дьиэ ис бараанын тупсарар малы-салы оҥорон биһирэнэллэр, араас минньигэс аһы астаан дьиэлээхтэрин күндүлүүллэр.
Ханнык баҕарар киһи айылҕа оҕото. Саввиннар да иллэҥ кэмнэригэр айылҕаттан күүс ылар үтүө үгэстээхтэр. Булааччы-талааччы, тутааччы аҕа киһи Виталий Петрович булчут бэрдэ. Алдан өрүс кытылын олохтооҕун быһыытынан балыктыырын олус сөбүлүүр. Уолаттарын бу үөрүйэҕэр, чөл туруктаах олоххо уһуйан, эркин курдук эрэллээх эр бэртэрин иитэргэ төһүү күүһүнэн буолар. Уопсастыбаннай үлэҕэ, спортка, ыччаты иитиигэ уопуттаах киһини Чэриктэй аҕаларын түмсүүтүн салайааччытынан талбыттара.
Саввиннар араас хайысханан дьарыктанар дэгиттэр талааннаах ыал. Бэйэлэрин холобурдарынан дьиэ кэргэн иһиттэн саҕалаан оскуолаҕа тиийэ кэнчээри ыччаты олоххо бэлэмнээх буоларга уһуйар дьоһун үлэһит, үтүө-мааны ыал. Бу курдук сиэттиспитинэн сайдыы туһугар эрэллээхтик хардыылааҥ, этэҥҥэ буолуҥ!
Ольга Шепелева