Бэйдиҥэ бөһүөлэгэр «Эҕэрдэ, махтал, педагогка» диэн тематическай хабааннаах көрсүһүү буолан ааста.
Тэрээһиҥҥэ Бэйдиҥэ бөһүөлэгин учуутал династияларын историятын Винокуровтар тустарынан Валентина Винокурова, Татариновтар педагогическай династияларын туһунан Николай Татаринов билиһиннэрдилэр.
А.П.Петров аатынан Бэйдиҥэтээҕи НАК директора Игнатий Слепцов Валентина Гаврильевнаҕа уонна Николай Николаевичка махтал суруктарын, ону тэҥэ Бэйдиҥэ сип-сибиэһэй мүөтүн бэлэх уунна.
Бэйдиҥэ бөһүөлэгэр саҥа үлэлии кэлбит, үлэлэрин Бэйдиҥэттэн саҕалаабыт учууталлар бэйэлэрин тустарынан билиһиннэрдилэр, талааннарын көрдөрдүлэр. А.Н. Жирков аатынан Бэйдиҥэтээҕи оскуола сэмэй бэлэхтэрин туттарда, бырааһынньыктааҕы эҕэрдэ тылын Ульяна Белова эттэ.
Биэчэр кэмигэр Иван Румянцев, Игнатий Слепцов учуутал туһунан ырыалары ыллаатылар, саҥа үлэлии кэлбит история учуутала Федот Винокуров хомус тардан иһитиннэрдэ.
Учуутал уонна уһуйааччы сылынан А.П. Петров аатынан Бэйдиҥэтээҕи НАК коллектива культура эйгэтин бастыҥнарыгар Варвара Гороховаҕа «Бастыҥ артыыс», Лариса Васильеваҕа «Бастыҥ коллектив салайааччыта», Любовь Стручковаҕа «Бастыҥ ырыаһыт», Любовь Даниловаҕа «Бастыҥ общественник» диэн анал ааттары, сэмэй бэлэхтэри, махтал суруктары туттарда.
Тэрээһин олус сэргэхтик, дьоһуннук ааста, сылдьыбыт эрэ бары астынан, махтал тылларын этэн тарҕастылар.
Винокуровтар педдинастияларын аатыттан Мария Федотовна тэрээһин туһунан:
— Учууталларга аналлаах үчүгэй тэрээһини ыыттылар. Династия аатыттан СДК коллективыгар, нэһилиэк, оскуола
администрацияларыгар махтанабыт! Кэрэхсэбиллээх тэрээһиннэри үрдүк таһымҥа инникитин да ыыта туруҥ.Сцена фона үчүгэйдик толкуйданан оһуобайдык оҥоһуллубут. Кэлбит дьон Татариновтар, Винокуровтар династияларын үүнэ турар элбэх лабаалаах мастарын кэрэхсии көрдөхтөрө.
Соһуччу үөрүүнэн, сонун көстүүнэн аҕабытын санатан Федот Винокуров диэн историк учуутал үлэлии кэлбитэ буолла. Ааспыт саас тапталлаах Мүрүбүт оскуолатын үбүлүөйүгэр эдэр учуутал Федот Винокуров хомустуурун биһирии, сөҕө истибитим. Биһиги аҕабыт бастаан үлэлииригэр историяны үөрэтэн элбэх биллэр историгы иитэн таһаарбыта: Иосиф Семёнович Портнягин, Иван Степанович Колодезников, Гаврил Гаврильевич Черкашин, Василий Иннокентьевич Жирков, Николай Михайлович Колодезников.
Бу үөрүүлээх тэрээһиҥҥэ өрүү буоларын курдук активнай позициялаах Валябыт — Валентина Гаврильевна династиябытын дьоһуннук сырдаппытын иһин махталбытын ыытабыт, өссө да династиябыт дьоһун бэрэстэбиитэлэ буолан айымньылаахтык үлэлии-хамсыы, эдэр көлүөнэ учууталларга муударай сүбэһит, наставник буола сырыт, — диэн санаатын үллэһиннэ.
.