Бээрийэҕэ ааспыт субуота бэрт сэргэхтик ааста. Ол курдук Россияҕа Дьиэ кэргэн, республикабытыгар Оҕо аймах, улууспутугар Аҕа сылын чэрчитинэн оскуола уолаттарын «Хоһуун» түмсүүлэрин салайааччыта технология учуутала Степан Слепцов көҕүлээһининэн «Аҕа уолунаан» диэн бэрт интэриэһинэй көхтөөх күрэхтэһии буолла.
Кыттааччылар ойбон алларыытыгар, автомат сааны ыһыыга, хомуйууга, ботуруону иитиигэ, сыал ытыытыгар, граната быраҕыытыгар уонна сүгэһэрдээх сүүрүү эстафетыгар күрэс былдьастылар.
Муҥутуур кыайыылааҕынан Петр уонна Ваня Васильевтар буоллулар, иккис миэстэ Петр, Рома Аргуновтар, үсүһү бэрт кыранан хаалан Константин уонна Костя Васильевтар ыллылар, мэтээллэринэн уонна сыаналаах бэлэхтэринэн наҕараадаланнылар. Кыттыбыт хамаандаларга биһирэбил бэлэхтэр туттарылыннылар.
Тыҥааһыннаах күрэхтэһии бириистэрин нэһилиэк дьаһалтата, урбаанньыт Геннадий Жирков, олохтоох култуура киинин кэлэктиибэ спонсордаатылар. Көрөөччүлэри аралдьытан дьахталларга хаатыҥканы ыраах быраҕыыга Мария Васильеваҕа тэҥнэһэр киһи суох буолла. Маны сэргэ култуура кэлэктиибэ чэй өрөн, эмис этинэн миин буһаран, минньигэс кэмпиэттэринэн, араас утахтарынан бары көрөөччүлэри уонна күрэхтэһээччилэри күндүлээтилэр.
Онон бу күрэхтэһииттэн бары кыттыылаахтар, ыалдьыттар ыраас сааскы салгыҥҥа дуоһуйа сынньанан, тото-хана аһаан, үөрэн көтөн тарҕастыбыт.
Саргылаана Бурнашева, уопсас. кэрэсп.