«Бастакылар» диэн оҕолорго уонна ыччакка аналлаах Бүтүн Россиятааҕы хамсааһын ыытар тэрээһиннэрин чэрчитинэн «Помоги первым» диэн маҥнайгы медкөмөнү оҥоруу күнүгэр аналлаах Бүтүн Россиятааҕы чемпионат ыытылла турар.
Бүгүн, балаҕан ыйын 30 күнүгэр, улуус сүүмэрдиир чемпионата биһиги оскуолабытыгар ыытылынна. Күрэскэ барыта улуус аҕыс оскуолата хамаандаларын кытыннарда. Хамаандалар видеролик көрөн баран, тестирование аастылар. Үс бастаабыт хамаанда регионнааҕы түһүмэххэ кыттар.
Биһиги оскуолабыт үс хамаанданы туруорда. Бастакы хамаанданы учуутал Федора Бурнашева, иккис хамаанданы учуутал Сайаана Протопопова, үһүс хамаанданы оскуола фельдшера Анастасия Жиркова салайдылар. Иккис, үһүс хамаандаҕа 11-с кылаастар, бастакы хамаандаҕа 9-с, 10-с, 11-с кылаастартан оҕолор кытыннылар.
Тестирование түмүгүнэн оскуолабыт бастакы хамаандата 1-кы миэстэ буолла, 2-с миэстэни Тумул оскуолатын хамаандата ылла, 3-с миэстэҕэ Бэйдиҥэ оскуолатын хамаандата таҕыста.
Кыайыылаах хамаанда кыттыылаахтара 10-с кылаас үөрэнээччитэ, капитан Саргы Бочкарева, 11-с кылаастан Юра Прибылых, 10-с кылаастан Анжелика Иванова, 9-с кылаастан Дима Добрецов уонна Дарина Ноговицына алтынньы 10 күнүгэр Дьокуускай куоракка улуустарын чиэһин көмүскүү барыахтара.
Уйгулаана Борисова, эдкор