Бары билэрбит курдук, быйылгы күһүн өтөр-наар билбэтэхпитин дьиктитийдэ. Ол курдук ардаан, хаардаан, тоҥорон, ириэрэн сир дойду аайы араастаан дьылын киллэрэн эрэр. Кыһыҥҥы хонук кэллэ эрээри, сайыҥҥылыы ардаабыта киһини дьиксиннэрэр.
Сэриибит буоллар тохтообот, балаһыанньа ыарахан… Мин, биир оҕотун сүтэрбит төрөппүт буолан туран, хас биирдии дьиэ кэргэн кутурҕанын өйдүүбүн, ылынабын. Государствобыт, правительствобыт сүрдээҕин көмө оҥорор.
Мин саастаах, соҕотох олорор киһибин. Нэһилиэгим салалтата, тэрилтэлэрэ, биирдиилээн дьон туох кыалларынан көмө бөҕөтүн оҥороллор. Үтүө санаалаах дьон өйөбүлүнэн дьиэм саҥалыы олбуорданан кырааскаланна, кыстык мас киллэриллэн эрбэнэн, хайытыллан саһааннанна, тэлгэһэм ото охсуллан кэбиһилиннэ, оскуола оҕолоро сайыммыт быйаҥыттан отон хомуйан аҕалан үөрүүбүн үрдэттилэр, улахан кылаас уолаттара орто оскуола патриотическай кулуубун салайааччыта Иван Петров салалтатынан көтүллүбүт олбуорум маһын эрбэтэн, хайытан биэрдилэр. Бу саастаах киһиэхэ улахан көмө. Онон бар дьоммор улахан махтал.
Аны бу күннэргэ дьиэбин киинтэн ититиигэ киллэрээри улууһум, нэһилиэгим салалталара ис-тас матырыйаалын аҕалтардылар. Киинтэн ыраах, мөлтөх суоллаах-иистээх нэһилиэккэ олорор буоламмыт, улахан таһаҕас кэлиитэ кыһалҕа буолар. Бу күннэргэ уһун ардах түһэн дьону да техниканы да улаханнык эрэйдээтэ. Ону ол диэбэккэ, дьон түмсүүлээх, биир кыһалҕалаах буолан, бэйэ-бэйэлэрин өйдөһөр буоланнар, хардарыта көмөлөсүһүү күүһүнэн син кыһалҕаттан үүт-хайаҕас булан тахсаллар. Бу буолар сомоҕолоһуу, биир тыыҥҥа киирии!
Улахан махталбын физкультура уонна маассабай спорт управлениетын салайааччытыгар Роман Оконешниковка кыһалҕаны толору өйдөөн техниканан хааччыйбытыгар этиэхпин баҕарабын. Ол курдук матырыйаалбын тэрилтэтин массыынатынан Бэйдиҥэ Арыылааҕар диэри тиэйэн аҕалан муҥура биллибэт үтүөнү оҥордо. Курбуһах орто оскуолатын салалтатыгар, тракторист Дмитрий Егоровка, Арыылаах олохтооҕор Иван Бурнашевка прицеп уларсан таһаҕас Курбуһаҕы булбутугар улахан махталбын тиэрдэбин. Нэһилиэгим баһылыгар Владимир Петровка, үлэ хаамыытын билсэ, дьаһайса олорбут улууһум баһылыгар Василий Аммосовка уонна дьаһалта аппараатыгар бары биир өйгө-санааҕа киирэн үлэ хаамыытын түргэтэппиттэригэр дириҥ махталбын тириэрдэбин, барыгытыгар тахсыылаах үлэни хамнаһы, доруобуйаны, олоххо дьулууру, инники көрүүлэри, эйэлээх халлааны.
Курбуһах олохтооҕо, үлэлээбэт пенсионерка Анна Винокурова