Саха сиригэр физкультурнай уонна спортивнай хамсааһыны төрүттээччи Николай Николаевич Тарскай үтүө үлэтигэр сүгүрүйэн, кини аатын кэриэстээн көҥүл тустууга биирдиилээн уонна хамаанданан бастыыр иһин республика чемпионата 1963 сылтан ыытыллар буолбута. Онтон 1981 сылтан Николай Тарскай аатыгар күлүк түһэрэн, бу күрэхтэһиини “Саха АССР Миниистирдэрин Сэбиэтин бирииһигэр” диэн уларыта сылдьыбыттара.
Уус Алдан оройуонунааҕы норуодунай дьокутааттар Сэбиэттэрин исполкома, өрөспүүбүлүкэ көҥүл тустууга федерацията уонна спортивнай уопсастыбаннаһа этии киллэриилэринэн Саха АССР Миниистирдэрин Сэбиэтэ 1989 сыл ахсынньы 21 күнүнээҕи 407 №-дээх уурааҕынан 1990 сылтан саҕалаан көҥүл тустууга өрөспүүбүлүкэ финальнай күрэхтэһиитэ үгэскэ кубулуйан, сыллата Саха сиригэр көҥүл тустууну төрүттээбит Н.Н. Тарскай кэриэһигэр тэрийэн ыытарга Саха АССР Госкомспорда көҥүллээбитэ.
Ити сыл бэс ыйыгар Уус Алдан оройуонугар Бороҕон пааркатыгар Н.Н. Тарскай аата чөлүгэр түспүтүнэн көҥүл тустууга өрөспүүбүлүкэтээҕи улахан күрэхтэһии үс күн устата үрдүк таһымҥа ыытыллан, Уус Алдан хамаандатын кыайыытынан түмүктэммитэ. Бу күрэхтэһии быыһыгар Николай Николаевич дойдутугар Баатаҕайга Араҥастаах алааска тахсаннар сүгүрүйүү, үйэтитии бэлиэтин – сэргэни туруорбуттара.
“Сэргэни олохтоох уус уолаттар Александр Иванович Готовцев (Саха Сааска) Семен Николаевич Готовцев оҥороннор, кэлбит дьон биһирэбилин ылбыттара. Н.Н. Тарскай 50-нус сыллар ортолоругар “Олимпиада чыпчаалын саха уолаттара дабайыахтара!” диэн эппитин толорооччулар, олимпийскай чөмпүйүөннэр Роман Михайлович Дмитриев, Павел Павлович Пинигин кыттыылаах Н.Н. Тарскай кылааһынньыктара, олохтоох норуот ырыаһыта Николай Тимофеевич Алексеев алгыһынан доҕуһуоллатан, үрдүк үөрүүлээх быһыыга өрө анньыбыттара”, – диэн 1989-1990 сс. Баатаҕай нэһилиэгин Сэбиэтин бэрэссэдээтэлинэн үлэлээбит Роман Петров “Дьулурҕан” хаһыакка бэчээттэммит ахтыытыгар суруллубут.
Кэнники күрүөтэ-хаһаата эргэрэн сууллубутун оскуола коллектива саҥардыбыта. Быйыл Баатаҕай нэһилиэгин дьаһалтата Николай Тарскай 100 сылын бэлиэтиир тэрээһиннэригэр, улуус дьаһалтатын көмөтүнэн, Н.Н. Тарскай үбүлүөйдээх ыһыаҕар диэри бу күрүөнү тимиринэн үйэлээхтик оҥорор, итиэннэ сэргэтин эмиэ саҥардар былааннаах.
Ольга Шепелева