Өрөспүүбүлүкэбитигэр Оҕо саас сылыгар «Азия оҕолоро» норуоттар икки ардыларынааҕы VIII оонньуулар ыытыллаллара – ураты суолталаах бэлиэ түгэн. Аан дойду оҕолорун кытта күөн көрсөн, күүһү-уоҕу, кыаҕы тургутуһа биһиги улууспутуттан 6 оҕо – бокса, чэпчэки атлетика, тхэквондо уонна, бүгүн биллибитинэн, греко-римскэй тустууга кыттаары бэлэмнэнии үөһүгэр сылдьаллар.
Боксаҕа Мүрү 2 №-дээх орто оскуолатын 9-с кылааһын үөрэнээччитэ Айсен Неустроев, 8-с кылаас үөрэнээччитэ Артур Дьячковскай, Олимпийскай эрэллэри бэлэмниир училище 9-с кылааһын үөрэнээччитэ Аян Борисов кыттыахтара.
Тхэквондоҕа Бэйдиҥэ орто оскуолатын 8-с кылааһын үөрэнээччитэ Егор Жирков, чэпчэки атлетикаҕа Мүрү 1 №-дээх орто оскуолатын 7-с кылааһын үөрэнээччитэ Диана Егорова тургутуһуохтара.
Греко-римскэй тустууга спортивнай хайысхалаах Мындааба орто оскуолатын 8-с кылааһын үөрэнээччитэ Савелий Стручков сүүмэрдэммит хамаанда састаабыгар киирбитэ күн бүгүн билиннэ.
Ону тэҥэ, оонньуулар үөрүүлээх арыллыыларыгар Россия үтүөлээх «Кэнчээри» образцовай оҕо народнай ансаамбыла, «Кэнчээри» эстетическэй киин үҥкүүгэ коллективтара, Найахы орто оскуолатын “Көлүкэчээн», Курбуһах орто оскуолатын “Үрүйэчээн”, Суотту орто оскуолатын “Өлүөнэ кытыла”, Тумул орто оскуолатын “Күндээр”, улуустааҕы оҕо спортивнай оскуолатын «Энергия» бөлөхтөрө кыттан, үөрүүнү үксэтиэхтэрэ, историяҕа киириэхтэрэ, киэн туттууну саҕыахтара. Маны тэҥэ, улууспут 40-ча оҕото волонтер быһыытынан бэйэлэрин көрдөрүөхтэрэ, оонньуулар тутаах үлэһиттэрэ буолуохтара.
Ольга ШЕПЕЛЕВА