Уус Алдан улууһун бэтэрээннэрэ, салайааччы Олег Фёдоров “Азия оҕолоро” спортивнай оонньуулар уоттарын көрсө Хаҥалас улууһугар аатырбыт Өлүөнэ очуостарыгар баран үөрэн-көтөн кэллибит. Суоппарбыт Михаил Пестерев уопуттаах үөрүйэхтэринэн уруулун бэркэ тутан, уһун айан этэҥҥ ааһан элбэх кэрэ өйдөбүллэри ыллыбыт. Биһигини бочуоттаах бэтэрээннэри босхо аһаран түһүлгэҕэ киллэрдилэр. Аатырдар саҥа каток чахчы даҕаны тэлэбииһэргэ көрөр катоктарбытыттан уратыта суоҕун сөхтүбүт. Биллиилээх хоккеистары илэ харахпытынан көрдүбүт. Кинилэр бу кэрэ Өлүөнэ очуоһун көстүүлэриттэн дуоһуйбут көрүҥнээхтэр. Саха киһитэ Аан дойду спордун номохторун кытары хоккей курдук сахаҕа саҥа эрээри түргэнник киирбит көрүҥҥэ оонньообута, дьэ, сонун. Онон биир дойдулаахпыт, оҕо сааһыттан Бороҕоҥҥо каток оҥорон спорт бу көрүҥүн бастакынан тарҕаппыт Клим Алексеевынан киэн тутуннубут.
Пааркаҕа муус сыыртан сырылааччы элбэх. Киэргэтиилээх сыарҕанан буран баҕалаахтары хатааһылатар. Онтон да атын аттракционнар элбэхтэр этэ. Эҕэрдэлэһэн, хоһоон ааҕан, ыллаан,санаа атастаһан бэтэрээннэр хамсааһыннарын биир күнүн манна атаарбыппыт ордук үчүгэйэ. Ааспыт сыл түмүгүнэн улуус бастыҥ үлэлээх Танда бэтэрээннэрин сүбэтин бэрэссэдээтэлэ Степан Константинович делегацияны тэрээһиннээхтик салайан илдьэ сырытта. Сүүрбэттэн тахса сыл Тулунаҕа бэтэрээннэр бэрэссэдээтэллэринэн үлэлээбит Мария Сторожева саамай аҕа саастаахпыт тэҥҥэ үөрэн бэрт эрчимнээхтик сырытта. Алгысчыт, ырыаһыт Дүпсүнтэн бэрэссэдээтэл Ульяна Босикова мааны куолаһа бу да сырыыга үөртэ. Мин саас туһунан саҥа хоһооммун аахтым. Өрөспүүбүлүкэ бочуоттаах бэтэрээнэ сэбиэскэй тутул, уларыта тутуу салайааччылара, баһылыктара Николай Сивцев Өлтөхтөн, Степан Фёдоров Тандаттан, Майаҕастан үлэһит бэрэссэдээтэл Прокопий Трулин, о.д.а көхтөөхтөрүн бэлиэтиибин. Быыһыгар скандинавскай паалканан хааман да ылыы баар буолла. Муус скульптуралары көрбүппүт туспа кэрэ өйдөбүл. Киэһэ уот умайан Өлүөнэ очуостарын паарката өссө тубуста.
Бу курдук кэрэ өйдөбүлү бэлэхтээбит улуус бэтэрээннэрин сүбэтин бэрэссэдээтэлэ Олег Федоровка, автобуһунан хааччыйбыт үөрэх управлениетын начаалынньыга Степан Литвинцевкэ, улуус баһылыга Василий Аммосовка, кураторбытыгар Анатолий Сторожевка махтанан күн, салгын, айылҕа аргыстанан, эдэрдии эрчимнэнэн кэллибит.
Ульяна Бурнашева суруналыыс