Анастасия Бурцева кинигэтэ нууччалыы тылбаастанан таҕыста

Бэтэрээн учуутал, СӨ үөрэҕириитин туйгуна, Петр Тобуруокап аатынан «Күндүттэн күндүнү олоҕу туойабын» анал бэлиэ хаһаайына Анастасия Бурцева «Дани-Алмас» компания» типографиятыгар «Восстановление после инсульта» кинигэтэ 50 экземплярынан бэчээттэнэн таҕыста.

Анастасия Николаевна Мүрү 1 нүөмэрдээх орто оскуолатыгар алын сүһүөх кылааска учууталлыы сылдьан 2008 сыллаахха бастакытын инсуллаабыта. Арыый ама буолан иһэн 2010 сыллаахха иккистээн охтубута. Ыарахан ыарыы уҥа өттүн охсубута, кыайан үчүгэйдик саҥарбат, илиитэ, атаҕа хамсаабат буолбута. 2013 сыллаахха аны үһүстээн ыалдьыбыта, өлөр-тиллэр икки ардыгар киирбитэ. Күүстээх санаатынан, олоххо тардыһыытынан, чугас дьонун өйөбүлүнэн бэйэтэ дьарыктанан хамсыыр-имсиир буолбута.

2021 сыллаахха «Инсульт кэнниттэн чөлгө түһүү» сүбэлэрдээх кинигэтин бэчээттэтэн таһаартарбыта. Ол кинигэтин нууччалыы тылбааһын 2024 сылга таһаартаран, туруоруммут сыалын ситэн сүргэтэ көтөҕүллэн сылдьар. Кинигэҕэ нейробикаҕа анал сорудахтар, харахха, илиигэ, атахха эрчиллиилэр, ону тэҥэ бэйэтэ туһаммыт А.Н. Белова анал дьарыктара сыһыарыы быһыытынан киирбиттэр.

Кинигэ бэчээттэниитин улуус баһылыга Василий Аммосов өйөөбүтэ, үбүнэн көмөлөспүтэ, Анастасия Николаевна киниэхэ улаханнык махтанар. Кинигэ бэрт кылгас кэм иһигэр тарҕанна, наадыйар дьон эккирэтиһэн ылла. Быйыл саас Анастасия Николаевна Р. Зорге аатынан өрөспүүбүлүкэтээҕи реабилитация киинигэр сытан тахсыбыта. Онно ыарыһахтарга, үлэһиттэргэ, ХИФУ устудьуоннарыгар кинигэтин билиһиннэрбитэ, маастар кылаас ыыппыта. Ону үгүс киһи биһирээбитэ, ону сылаас махтал тыынынан илгийэр истиҥ суруйуулара туоһулууллар. Николай Туприн — Кэһиилээх Уола Анастасия Николаевна модун санаатын сөҕөн суруйбут «Санаа күүһэ» хоһоонунан түмүктүүбүн.

Санаа күүһэ

Бурцева Анастасия Николаевнаҕа

Үөһээ айыылартан ананар
Олох суола, дьылҕа,
Ол сиэринэн сыстар
Киһи олоҕор кыһалҕа.

Оннук түгэн ааҥнаабыт
Уус Алдан Настаатыгар,
Уйулҕа айманан ылбыт
Тулууру, дьулууру үөскэппит.

Маҥан халааттаах аанньаллар
Өйгө-санааҕа саҕаллар,
Эрэли, сырдыгы түстүүллэр,
Санааҕа күүһү эбэллэр.

Үс төгүл инсулу
Санаатын күүһүнэн кыайбыт
Дьиҥнээх бухатыыр Настаа –
Барыбыт олоҕор холобур.

Иккис кини үтүөтэ
Бар дьонугар бэлэҕэ –
Ис дууһатын кэрэтэ
Эмтэнэр методика айбыта.

Барҕа махтал Настааҕа
Кини санаатын кэскилигэр,
Санаатын ыырын ырааһыгар,
Күндүттэн күндү баҕатыгар.

Үтүө үйэҕин уһаттын
Олоххо дьулууруҥ кынаттаннын,
Санааҥ күүһэ сарыалланнын
Олоххо тапталыҥ угуйдун.

Елена Сыроватская, уопсас. кэрэсп.