Аммаҕа ыччакка уонна аҕам саастаахтарга «Поколения» өрөспүүбүлүкэтээҕи лааҕыр күрэхтэһиитэ иккис сылын ыытылынна. Манна Уус Алдан улууһун хамаандата быйыл эмиэ бастаата.
Бу туһунан хамаанда салайааччыта Ирина Басыгысова билиһиннэрэр:
– Быйыл атырдьах ыйын 1-3 күннэригэр Амма өрүс биир саамай кэрэ көстүүлээх сиригэр көлүөнэлэр күрэхтэһиилэригэр кыттан кыайыылаах кубогын ылан кэллибит. Былырыын эмиэ бастаабыппыт. Хамаанда састаабыгар түөрт ветеран, икки ыччат уонна биир салайааччы буолан кытынныбыт. Быйыл аҥаарбыт саҥа дьон сырыттылар. Ол курдук улууспут чиэһин Арыылаахтан Варвара, Ефим Дегтяревтар, Суоттуттан Марфа Прудецкая, Найахыттан Уйбаан Никифоров, Мүрүттэн Алина Алексеева, Түүлээхтэн Айтал Иванов көмүскээтибит. Илин эҥээрдэр күрэхтэһиилэрэ диэн этэ даҕаны, быйыл хаҥаластар уонна Дьокуускайтан МЧС хамаандата кытыннылар.
Биһиги үс күннээх хатыһыылаах күрэхтэһиигэ “полоса препятствий” көрүҥҥэ, мохсуо быраҕыыга 1-кы буолан, ытыыга 2-с миэстэни ылан эрэллээхтик кыайдыбыт. Былырыын даҕаны, быйыл даҕаны кэннибитигэр сэттэ хамаанданы хаалларан уус алданнар ааппытын ааттаттыбыт.
Олус бэркэ күрэхтэһэн, сөтүөлээн сынньанан кэллибит. Аммалар тэрээһиннэрэ олус үчүгэй. Бу күрэхтэһиигэ тэрийэн ыыппыт улуус бэтэрээннэрин сэбиэтин бэрэссэдээтэлигэр Олег Федоровичка, алгыс тылынан атаарбыт ытык кырдьаҕаспыт Мария Егоровна Фоминаҕа, улууспут дьаһалтатыгар, үөрэх управлениетын начаалынньыга Степан Моисеевичка, суоппарбытыгар Егор Тарабукиҥҥа улахан махталбытын тиэрдэбит.
