Кинигэни бэлэмнээбит РСФСР үөрэҕириитин туйгуна, тустууга уонна хапсаҕайга спорт маастара, спорт бэтэрээнэ, норуоттар икки ардыларынааҕы категориялаах судьуйа, Уус Алдан улууһун, Мүрү, Дүпсүн уонна Курбуһах нэһилиэктэрин бочуоттаах олохтооҕо, спорт эйгэтигэр таһаарыылаахтык үлэлээбит уонна билигин да үлэлии сылдьар, улуус спордун сайдыытыгар үгүс кылаатын киллэрбит Николай Крылов буолар.
Николай Романович Мындааба бөһүөлэгин элбэх оҕолоох дьиэ кэргэнигэр төрөөбүтэ. Аҕата МТС биир бастыҥ тракториһа, Аҕа дойду сэриитин сылларыгар тыылга кыайыыны уһансыбыт үтүө үлэһит Роман Андреевич Крылов уонна ийэтэ Анастасия Макаровна Окоемова буолаллар.
Николай 1978 с. Душанбе куоракка М.И. Калинин аатынан Таджикскай физкультурнай институту ситиһиилээхтик бүтэрбитэ. Онтон ыла спорт эйгэтигэр үлэтэ саҕаланан, үгүс ыччаты спортка көҕүлээн, иитэн-үөрэтэн кэлбитэ 45 сыл буолла.
Кини Саха сиригэр физкультурнай хамсааһын 100, Педагог уонна настаабынньык сылыгар үлэлээбит сылларын, дьоһун олоҕун кэрэһэлиир «Алгыстаах олох аартыгынан» уонна «Мындааба спортсменнара» диэн кинигэлэри бэчээттэппитэ.
Манан сибээстээн кинигэлэр сүрэхтэниилэрэ Мындаабатааҕы сынньалаҥ киин дьиэтигэр бар дьонун иннигэр тэрилиннэ. Дьоһун түгэни Людмила Андросова иилээн-саҕалаан ыытта.
Дьоро киэһэҕэ кинигэ ааптарыгар Николай Крыловка үйэтитии түбүктээх үлэтигэр ылсан, спорт эйгэтигэр суолталаах үлэни оҥорбутунан улуус баһылыга Василий Аммосов, улуус дьаһалтатын спортка отделын начальнига Евгений Алексеев, оҕо спортивнай оскуолатын дириэктэрэ Михаил Слепцов, Уус Алдантан төрүттээх спорт бэтэрээннэрин түмсүүтүн бэрэссэдээтэлэ Зинаида Афанасьева, Мүрү нэһилиэгин баһылыгын солбуйааччы Вероника Сивцева эҕэрдэлээтилэр, үтүө баҕа санааларын тиэртилэр.
Ольга Шепелева