Ленинград блокадатын 80 сылыгар аналлаах бүтүн Арассыыйатааҕы «Бастакылар хамсааһыннарын» «Блокадной вечности страницы» акциятын чэрчитинэн Уус Алдан улууһун Лөгөй орто оскуолатыгар активист үөрэнээччилэр тэрээһиннэринэн сонун акцияны тэрийдибит.
Блокада кэмигэр Ленинград олохтоохторо бука бары түөстэригэр кыракый тимир жетону иилинэ сылдьаллара – бу хорсун самныбат санаа бэлиэтэ – тумсугар сурук кыбытыылаах, элэстэммит хараҥаччы чыычаах ойуулаах этэ. Бу значок ньиэмэс халабырдьыттарыгар дьоһун эппиэт этэ – фашистар Ленинград куоракка биир да чыычаах да көтөн киириэ суоҕа диэн күүстээхтик санаммыттара.
Төһө да аччыктаан, сору-муҥу көрдөллөр, Ленинград кытаанах санаалаах олохтоохторо барахсаттар кыайыыга эрэллээхтэрэ, бу кылыс курдук көтөр сытыы көтөр курдук, биһиги харса суох санаабытын ким да кыайыа суоҕа, өстөөҕү уодьуганныы, сэриилэһэ сылдьар хаан-уруу дьоммутун кытта син биир сибээстэһиэхпит, кинилэртэн үтүө сураҕы хайаан да истиэхпит диэн бүк эрэнэллэрэ.
Тапталлаах модун күүстээх Ийэ дойдубут биһигини иэдээҥҥэ хаалларыа суоҕа, биһиги кыайыахпыт диэн күүстээхтик итэҕэйэллэрэ, ол санаалара үрүҥ күн сырдыгынан сыдьаайарыныы сандаарбыта, Кыайыы сардаҥата барыларын кууспута.
Биһиги «Блокадная ласточка» акция Аҕа дойду сэриитигэр Ленинград куораты блокадаттан көмүскээһиҥҥэ күүс-көмө буолбутун туһунан истэн Улуу Кыайыыга дьон өйүгэр-санаатыгар күүстээх санааны уонна кыайыыны аҕалсыбытын чахчы итэҕэйдибит.
Билигин Украинаҕа буола турар анал байыаннай дьайыыга Саха сириттэн үгүс ахсааннаах саха саллаата хорсуннук сэриилэһэ сылдьарын истэбит, билэбит. Украинаҕа сэриилэһэ сылдьар буойуттарбытыгар анаан Саха сирин тыйыс тымныытыттан толлубакка кыстыыр саамай кыраһыабай ырыаһыт күөрэгэй чыычааҕын бэлиэ оҥостон, «Жаворонок –маленькая птичка с большим храбрым сердцем: ЗА ПОБЕДУ!» диэн акцияны толкуйдаан харысхал оҥорон туттардыбыт. Бу харысхалбыт Кыайыыны аҕаларын туһугар, Россия иһин хорсуннук сэриилэһэ сылдьар буойуттарбыт бары түргэнник Кыайыы үктэллэнэн дойдуларыгар төннөн кэлэллэрин туһугар диэн ис хоһоонноох.
Улууспут, өрөспүүбүлүкэбит оҕолоро «Жаворонок – маленькая птичка с большим храбрым сердцем: ЗА ПОБЕДУ!» диэн акциябытыгар холбоһуохтара диэн эрэнэбит.
Дарина Басыгысова, Дарина Бурнашева, 10-с кылаас үөрэнээччилэрэ