РСФСР норуотун үөрэҕириитин туйгуна, “Үлэҕэ килбиэнин иһин” мэтээл кавалера, сэрии кэмин оҕото, педагогическай үлэ бэтэрээнэ, Өнөр нэһилиэгин олохтооҕо Лыткина Агафья Павловна тохсунньу 19 күнүгэр 85 сааһын туолла.
Агафья Павловна Кэбээйи улууһун II Сииттэ нэһилиэгэр 1940 сыл тохсунньу 19 күнүгэр төрөөбүтэ. Оскуола кэнниттэн Иркутскай куоракка тиийэн Хо Ши Мин аатынан омук тылларын үөрэтэр институту саха оҕолоруттан бастакылар кэккэлэригэр киирсэн ситиһиилээхтик үөрэнэн бүтэрбитэ.
Ол кэннэ үлэтин, олоҕун олоччу оскуоланы кытта сибээстээн, үөрэнээччилэри француз омук тылыгар уһуйбута, дириҥ билиитин, үлэҕэ баай уопутун үллэстэн кэккэ сылларга завучтаабыта. Дүпсүн, Өнөр оскуолаларыгар өр сылларга үлэлээн, үөрэнээччилэрин, кэллиэгэлэрин, бүтүн нэһилиэнньэ убаастабылын ылбыта. Үөрэппит оҕолоруттан 19 үөрэнээччитэ француз тылын учуутала буолбута.
Олортон СӨ үөрэҕириитин үтүөлээх үлэһитэ, социологическай наука кандидата, АХШ Анкоридж куоратыгар Хотугу Форум секретариатыгар СӨ бэрэстэбиитэлинэн үлэлээбит Анастасия Божедонова, үөрэҕирии туйгуннара: үөрэх управлениетыгар өр кэмҥэ иниспиэктэринэн үлэлээбит Евдокия Горохова, уолаттар гимназияларыгар омук тылын үөрэппит Тамара Дорофеева, Людмила Леонтьева, Мүрү 1 №-дээх орто оскуолатыгар айымньылаахтык үлэлиир Анастасия Новогодина, Дүпсүн орто оскуолатыгар өр сылларга үлэлээбит талааннаах учуутал Татьяна Сыроватская, о.д.а. бааллар.
Дүпсүн орто оскуолатыгар үлэлиир кэмигэр Агафья Павловна үлэтэ үрдүктүк сыаналанан, оччолорго үөрэх салаатын үлэһиттэригэр сэдэхтик туттарыллар “Үлэҕэ килбиэнин иһин” мэтээлинэн наҕараадаламмыта оскуола, улуус үөрэҕин салаатын историятыгар суруллубута.
Агафья Павловна тас көрүҥүн курдук олус кэрэ санаалаах, холку майгылаах, оҕоҕо, дьоҥҥо-сэргэҕэ истиҥ сыһыаннаах киһи. Дүпсүҥҥэ 1967 сыллаахха оскуоланы бүтэртэрбит оҕолоро, билигин бэйэлэрэ бочуоттаах сынньалаҥҥа олорор үлэ бэтэрээннэрэ, ону тэҥэ араас сылларга үөрэппит үгүс үөрэнээччилэрэ учууталларын кытта сибээстэрин быспаттар, билсэ олороллор. Бу буоллаҕа учууталга дириҥ махтал, учуутал үөрэппит оҕолорунан баай дииллэрэ.
Агафья Павловна төрөөбүт күнүгэр Өнөр нэһилиэгин баһылыга Николай Лукачевскай, оскуола дириэктэрэ Николай Сыроватскай ытык киһилэрин улуус, нэһилиэк дьаһалталарын, оскуола кэлэктиибин ааттарыттан истиҥник эҕэрдэлээтилэр. Үтүө баҕа санааларга кыттыһан үөрэппит бары үөрэнээччилэрин аатыттан Агафья Павловнаҕа этэҥҥэ буолууну, өссө да уһуннук олороругар баҕарабыт.
Елена Сыроватская, үөрэнээччитэ, уопсас. кэрэсп.