Мүрү нэһилиэгин бочуоттаах олохтооҕо Сергей Васильев улуустааҕы РЭС тэрилтэтигэр 1981 сыллаахха электромонтерунан үлэҕэ киирэн баран, кэлин кылаабынай инженеринэн уопсайа 40 сыл устата эҥкилэ суох бэриниилээхтик үлэлээбит тэрилтэ биир ытыктанар бэтэрээнэ буолар.
Кини үлэтин үтүө холобурун батыһан, Сергей Иванович үс оҕотуттан кыра уола Иван Сергеевич аҕатын туйаҕын хатаран, Дьокуускайдааҕы 16 №-дээх училищеҕа электромонтажник, онтон радиотехническэй колледжка электрическэй уот ситимнэрин уонна станцияларын исписэлииһин идэлэрин бүтэрэн, эмиэ бу тэрилтэҕэ быйыл 12-с сылын электромонтерунан, билигин диспетчеринэн үлэлии-хамсыы сылдьар. Маны тэҥэ эдэр үлэһит ХИФУ Нерюнгритааҕы техническэй институтугар 3 кууруска кэтэхтэн үөрэнэр.
Иван Васильев: “Аҕам оҕо эрдэхпиттэн биһиэхэ сабыдыала улахан этэ”, – диир. “Ол да иһин кини суолунан баран, олох эйгэтин биир тыын боппуруоһун быһаарар тутаах тэрилтэҕэ билигин да үлэлии-хамсыы сылдьабын. Ыал аҕа баһылыгын быһыытынан кини эр киһи, хаһаайын буоларга бастакы үөрүйэхтэри иҥэрбит эбит.
Ол курдук, булт буоллун, тиэхиньикэни оҥостуу буоллун бииргэ илдьэ сылдьааччы. Оннук биһигини идэтигэр да, тиэхиньикэҕэ да сыһыарбыт эбит. Аҕа оҕолоругар үтүө сыһыана, кыһамньыта диэн бу буолар дии саныыбын”, – диэн аҕатыгар махталын этэр.
Екатерина Захарова