Быйыл улууспутугар Аҕа сыла биллэриллэн турар. Ол бэлиэтин оҥорууга куонкурус биллэриллэрин туһунан улуус баһылыга Василий Аммосов тохсунньу 11 күнүгэр дьаһал таһааран, үлэлэри дьүүллүүр анал хамыыһыйа тэриллибитэ. Куонкурус ыытыллар кэмэ төһө да кылгас буоллар кыттааччылар үлэлэрин балачча киллэрбиттэрэ. Көрүү түмүгүнэн кыайыылааҕынан Бээрийэ оскуолатын дириэктэрин хаһаайыстыбаннай чааска солбуйааччы Евгений Сивцев кыайыылааҕынан тахсан, бүгүн улууска Аҕа сылын бэлиэтиир тэрээһиҥҥэ Евгений куонкуруска кыайбытын туоһулуур диплому уонна харчынан сертификаты улуус баһылыгыттан Василий Аммосовтан тутта.
Евгений бэйэтэ эппитинэн 2022 сылтан бэлиэлэри оҥоруунан дьарыктанан куонкурустарга кыттан барбыт. Ити сыл билсиһии, дьон хайдах оҥорорун көрүү курдук барбыт. Онтон дьэ, 2023 сыллаахха бастакы кыайыы кэлбит. Ол курдук улуустааҕы үөрэх үлэһиттэрин идэлээх сойууһун ыччатын түмсүүтүн анал бэлиэтин оҥоруу куонкуруһугар кыттан бастакы миэстэни ылбыт.
“Ити кэнниттэн билиибин-көрүүбүн өссө сайыннараары онлайн икки ыйдаах “Photoshop” бырагыраама куурсугар үөрэммитим. Онон быйылгы куонкуруска быдан эрэх-турах туттан кытынным диэххэ сөп. Биир сарсыарда сонун санаа киирэн “CorelDRAW”, “Photoshop” бырагыраамалар көмөлөрүнэн оҥорон саҕалаабытым. Тус бэйэм баҕабынан уонна көрүүбүнэн сахалыы тыынныы сатаатым. Бу бэлиэ улууспут инники сайдыытыгар аҕа оруола үрдүүрүгэр араҥаччы буолуо диэн эрэнэбин.
Куонкурустарга кыттарбар куруук оскуолам кэлэктиибэ өйүүр. Онон түгэнинэн туһанан махталбын биллэрэбин”, – диэн санаатын үллэһиннэ.
Евгенийгэ салгыы өссө үрдүк таһымнаах күрэстэргэ кыттан кыайыы көтөллөнөрүгэр баҕарабыт.
Афанасий Сектяев