Геройдар күннэригэр Мүрү 1 нүөмэрдээх орто оскуолатын 10 кылаастарын үөрэнээччилэрэ байыаннай дьайыы кыттыылааҕа Василий Данилов пааматынньыгар сибэкки дьөрбөтүн уурдулар.
Россия үрдүнэн ыытыллар Геройдар күннэригэр Мүрү 1 нүөмэрдээх орто оскуолатын 10 «а» (кыл. сал. Л.В. Бурцева) уонна 10 «б» (кыл.сал. А.П. Москвитина) кылаастарын үөрэнээччилэрэ байыаннай дьайыыга хорсуннук сэриилэһэ сылдьан охтубут гвардия старшай сержана, өлбүтүн кэннэ «Эр санаа» уордьанынан наҕараадаламмыт оскуола 2006 сыллааҕы выпускнига Василий Данилов пааматынньыгын аттыгар кылаас чааһа ыытылынна.
Оскуола музейын үлэһитэ Елена Сыроватская байыаннай дьайыы кыттыылааҕын Василий Данилов туһунан кылгас иһитиннэриитин кэннэ 10 «а» кылаас үөрэнээччитэ Альберт Ефимов пааматынньык фундаменын оҥорууга биир күн үлэлээбитим диэн киэн тутта кэпсээтэ. Биир дойдулаахпытын, отделение хорсун хамандыырын Василий Даниловы кэриэстээн оҕолор чуумпуран ыллылар, сибэкки дьөрбөтүн уурдулар.
Геройдар ааттара умнуллубатын!
Елена Сыроватская, уопсас.кэрэсп.