«Баатаҕай баараҕай тиитэ» диэн кинигэ сүрэхтэниитэ балаҕан ыйын 12 күнүгэр буоларын «Халдьаайы» ватсап-бөлөххө көрөн, билсэр төлөпүөн нүөмэригэр эрийбитим балтыбыт Люба Готовцева буолла. Тулунаҕа баар балтыбынаан икки кинигэни үлэһээри гыммытым, бүтэһик кинигэ хаалбыт эбит. Хата бүтэһик кинигэҕэ түбэһэн Баатаҕай уонна Тулуна икки ардыгар син балачча уһуннук айаннаан күүтүүлээх кинигэбит тиийэн кэллэ.
Бырааппынаан былдьаһа-тараһа, эдьиий киһи быһыытынан быһа түһэн ааҕан бүтэрдим. Бырааппыт Игнат Петрович Готовцев оҕо сааһын туһунан эдьиийэ, үөлээннээҕим Таанньа-Татьяна Петровна Белолюбская ахтыытын харах уулаах аахтым. Игнат, кинилэр этэллэринэн, Кынаачай оҕо сааһын туһунан бииргэ улааппыт доҕотторо, табаарыстара сиһилии ахтыбыттара харахпытыгар документальнай киинэ курдук көһүннэ. ДьПУ-1 устудьуоннаабыт сылларын, успуорка ситиһиилэрин, олохторун сөптөөхтүк булуналларыгар үгүс сүбэни ылыммыт бииргэ үөрэммит, күрэхтэспит дьонун аатыттан бары бэркэ билэр киһибит Александр Николаевич Ким-Кимэн, Саха сирин үтүөлээх тренера Андрей Васильевич Федоров суруйбуттарын ааҕан элбэҕи биллибит. Тумул орто оскуолатыгар физкультура учууталынан үлэлииригэр оччотооҕу успуорка уһуйбут, үгүһү ситиспит үөрэнээччилэрэ Василий Петрович Алексеев, Петр Спиридонович Алексеев сиһилии ахтан, махтал тылларын анаабыттар. Баатаҕай нэһилиэгэр 18 сыл баһылыгынан үлэлээбит олус уустук, эппиэтинэстээх, нэһилиэгин дьонун олохторун тупсарыыга күүскэ ылсан үгүс уларытыыны киллэрбитин нэһилиэк араас араҥа дьоно-сэргэтэ истиҥник ахтан махтал тылларын суруйбуттар. Бүтүн нэһилиэгинэн баһылыктарын тула түмсэн үгүс да үлэ ыытыллыбыт эбит. Кинигэни ааҕа олорон дойдум дьонунан киэн туттуу, долгуйуу ыга кууста. Кинигэҕэ ахтыылар быыстарыгар үгүс көрдөөх түгэннэр киирбиттэрэ сэргэхситэр, күлэн да ыларбыт эмиэ сонун эбит.
Кинигэни Игнат Петрович улахан кыыһа Люба Готовцева хомуйан 100 экземплярынан «ДаниАлмас» хампаанньаҕа оҥотторбут. Люба: «Мин хас биирдии ахтыыны дууһам нөҥүө аһардым, уруут-урут төрүү илик кэмнэрбэр бара сырыттым…» – диэн долгуйа суруйар. Түһүмэх аайы уруккуттан хоһоон суруйар киһи дууһата айманан айан кэбиспит хас биирдии ааҕар киһини дууһатын долгутар хоһооннорун киллэрбит.
Уус Алдан улууһугар бэйэтин үтүө суолун-ииһин хаалларбыт, СӨ атах оонньууларыгар, 400 м сүүрүүгэ улууска успуорт араас көрүҥнэригэр, сайыҥҥы-кыһыҥҥы многоборьеҕа 28 төгүл кыайыылааҕа СӨ үөрэҕириитин туйгуна, улууска 2006 сылга «Лучший глава наслега» анал ааты ылбыт «За заслуги социально-экономическом развитии РС/Я/» түөскэ кэтиллэр бэлиэни ылбыт, үгүс хайҕал грамотанан наҕараадаламмыт, улууска биир саамай уһуннук баһылыгынан үлэлээбит, 2017 сыллаахха ыарахан ыарыыттан олохтон туораабыт Игнат Петрович Готовцев туһунан сэдэх кинигэ күн сирин көрбүтүнэн биһиги дойдубутуттан тэйиччи олорор аймахтара дьиэ кэргэнигэр, чуолаан кыыһыгар Любаҕа улахан махталбытын биллэрэбит.
Тулунаттан Мариса Васильева-Күбэйэ