Бу күннэргэ М.Н. Готовцев аатынан Танда орто оскуолатын бэтэрээн учууталлара оскуоланы 1990 с. үөрэнэн бүтэрбит үөрэнээччилэрэ Екатерина Бястинова (Васильева) тэрийиитинэн Хаҥалас улууһун Өктөмүгэр сырыттылар. Айан туһунан Танда орто оскуолатыгар 1988-2020 сс. математика учууталынан үлэлээбит СӨ үөрэҕириитин туйгуна, «Уус Алдан үөрэҕириитин сайдыытыгар кылаатын иһин» анал бэлиэлэр хаһаайына Ольга Румянцева сэһэргээтэ:
– Алтынньы 27 күнүгэр, Дьокуускай куорат СӨ «Сахабэчээт» судаарыстыбаннай автономнай тэрилтэтин үлэһиттэрин идэлээх сойууһун бэрэссэдээтэлинэн, «Забота-Арчы» хаһыат кэрэспэдьиэнинэн үлэлии сылдьар үөрэнээччибит, Танда орто оскуолатын 1990 сыллааҕы выпускницата Екатерина Бястинова (Васильева) көҕүлээн, тэрийэн, тэрилтэтин үлэһиттэрин уонна үөрэммит оскуолатын бэтэрээн учууталларын өрөспүүбүлүкэбит бастакы Президэнин М.Е. Николаев төрөөбүт дойдутугар – Хаҥалас улууһун Өктөмүгэр босхо автобуһунан күүлэйдэтэн, быйылгы Педагог уонна аҕа сүбэһит сылынан бэртээхэй бэлэх оҥорон үөрүүбүт, махталбыт муҥура суох.
Өр сылларга оскуолаҕа бииргэ үлэлээбит, билигин Дьокуускайга бочуоттаах сынньалаҥҥа олорор кэллиэгэлэр: К.А. Анисимова, А.И. Заболоцкая, Л.Н. Заболоцкая, А.Ф. Местникова, О.В. Румянцева, М.Н. Тарская, А.В. Бурцева көрсөммүт сэлэһэн ахтылҕаммытын таһаардыбыт, сонун сиргэ элбэҕи билэн-көрөн кэлэн сэргэхсийдибит, дуоһуйа сынньанныбыт. М.Е.Николаев туттарбыт Саха Өрөспүүбүлүкэтин наукатын Аччыгый Академиятыгар, выпускниктар көҕүлээһиннэринэн тутуллубут П.И. Шадрин аатынан саҥалыы тутуулаах оскуолаҕа, М.Е. Николаев үөрэммит оскуолатын базатыгар тэриллибит Хаҥалас улууһун үөрэҕириитин историятын музейыгар сылдьаммыт дириҥ ис хоһоонноохтук кэпсиир экскурсоводтар сэһэннэрин истэммит, бастакы Президеммит М.Е. Николаев үлэтин-хамнаһын, олоҕун кэпсиир элбэх матырыйаалы көрөн астынныбыт, кини үөрэммит оскуолатыгар сырыттыбыт, төрөөбүт дойдутун дьонноро кинини таптыылларын, киниэхэ сүгүрүйэллэрин илэ харахпытынан көрөн, эт кулгаахпытынан истэн астынан аҕай кэллибит. Бу умнуллубат күнү бэлэхтээбит үөрэнээччибитигэр Екатерина Бястиноваҕа махталбытын тиэрдэбит. Учуутал уонна аҕа сүбэһит сылыгар бэлэх буолбут айан-сырыы оскуолаҕа үлэлээбит сылларбытын санатта, бастакы Президеммитинэн киэн туттуу дууһабытыгар сөҥнө.
Елена Сыроватская, уопсас. кэрэсп.