Г.В. Егоров аатынан Мүрү 1 нүөмэрдээх орто оскуолатыгар алтынньы 16 күнүгэр оскуола үөрэнээччилэрин лиидэрин быыбара үөрэнээччилэр быһаччы тэрийиилэринэн ыытылынна. Түөрт кандидаттан 9 «б» кылаас үөрэнээччитэ Эрсан Готовцев баһыйар ахсааннаах 164 куолаһы ылан лиидэринэн талылынна.
Эрсан кыра кылаастан үчүгэйдик үөрэнэр, 1-кы кылаастан саҕалаан тустуу секциятыгар сылдьар. Билигин өрөспүүбүлүкэтээҕи оҕо спортивнай олимпийскай резервэ оскуолатын Уус Алданнааҕы филиалыгар тустуу секциятыгар тириэньэр Петр Соловьев салайыытынан эрчиллэр. Эрсан көҥүл тустууга өрөспүүбүлүкэҕэ хас да төгүл бастаабыта, призердаабыта.
Биэс оҕолоох ыалга ортоку оҕо буолан билигин балыстарын көрөн-истэн төрөппүттэригэр көмөлөһөр. Аҕата Николай Николаевич Готовцев Мындааба орто оскуолатын дириэктэрэ, ийэтэ Мария Ивановна эмиэ бу оскуолаҕа тэрийээччи педагог, дириэктэр сүбэһитэ. Ыал икки улахан уола устудьуоннар. Онон дьиэ ис-тас үлэтигэр ийэҕэ, аҕаҕа көмө Эрсаҥҥа сүктэриллэр.
Эрсан дуоспуруннаах, лоп-бааччы тыллаах-өстөөх уол. Быыбарга кыттарыгар оҥостубут бырагырааматыгар үөрэх, үөрэнээччилэр бэйэлэрин салайыныылара бастакы күөҥҥэ турар. Маны тэҥэ оҕо инициативатын киинин аһан үлэлэтиэн баҕарар.
Елена Сыроватская, уопсас. кэрэсп.